Lafaek News—Komunidade Tasi Tolu suku Komoro, liu husi portavós Sabino Pereira, hakilar ba Sekretaria Estadu Asuntu Toponomia no Organizasaun Urbana (SEATOU) uza forsa ditadura hodi halo evikasaun ba povu kiik ne’ebé buka moris iha kapital Dili.
Sabino Pereira hatoo asuntu ne’e liu husi konferénsia imprensa, Domingu (21/04/2024), hodi hatoo karta petisaun ho hakraik-an husu ba Primeiru Ministru Kay Rala Xanana Gusmão, atu halo intervensaun lalais asaun forsa ne’ebé SEATOU uza hodi halo eviksaun ba komunidade Tasi-tolu.
“Ami komunidade afetadu ho hakraik an reafirma ami nia posisaun hodi fundamenta ba sua exelensia primeiru Ministru Kay Rala Xanana Gusmão sobre asaun governu nian liu husi Sekretaria Sstadu Toponomia ne’ebé notifika verbalmente komunidade iha area juridisaun postu administrativu Dom Aleixo Munisípiu Dili suku Komoro aldeia 12 de Outubru,” Sabino Pereira ba jornalista sira iha konferénsia imprensa Tasi Tolu, Domingo, (21/04/2024)
Sabino argumenta katak parte Governu Sekretaria Estadu Assunto Toponomia no Organizasaun Urbana, no parte relevante sira hodi halo aproximasaun ba komunidade atu rona parte governu nia asaun ne’ebé atu hasai komunidade husi Tasi-Tolu, tanba governu laiha konsiderasaun no la halo aproximasaun ho komunidade molok halo asaun forsa hodi hasai komunidade husi fatin refere.
“Karik planu ne’e antes ami nia hanoin ka ami nia ezize povu ba estadu antes atu foti desizaun ruma ba ami povu sira ne’ebé mak iha area afetadu ida ne’e importante presiza mai halo aproximasaun uluk ho ami para oinsá ami bele hatene i ami bele rona desizaun husi ami desizaun husi sira para ita bele la’o tuir sira nia hakarak maibé mai ida hanesan ne’e ami rasik mós iha ne’e la senti hanesan mai be tiba tiba de’it uja pilox uma ne’e husi rohan ne’eba mai to rohan ne’e hanesan iha area ida ne’e sira nia hakarak hasai tomak,” Sabino akresenta.
Sabino esplika, iha lei povu mós Iha direitu hodi hetan fatin no rai pedasuk ida hodi buka moris, maibé governu tenke kopera ho komunidade hodi tanba dezenvolvimentu mós presiza halo maibé iha liña kordenasaun ne’e importante ho povu hodi bele halo dezenvolvimentu ba rai ida ne’e.
“Ami mós nu’udar povu la satisfas tanba iha lei hateten katak povu iha direitu atu hetan rai pedasuk ida rai ne’e ita konsidera ita prontu atu kopera ho estadu bainhira dezenvolvimentu ruma iha atu mai karik iha ne’e maibé presiza mós sira nia aproximasaun konsidera sira nia povu iha fatin ida ne’e ami la satisfas bainhira sira mai la konsidera la konsidera signifika sira mai la halo aproximasaun ho ami mai ho ditadura” portavoz ne’e hakotu lia.
Jornalista : Aniceto Dias
Editor : Agapito de Deus
