Lafaek News—Komunidade Aldeia Manmera Suku Mulo Posto Administrativo Hatu-Builico Munisipio Ainaro, labele koileta sira nia produtu local sira hanesan repoilu, koto, talas no kontas hetan estragus hafoin kauza hosi mudansa klimátika.
Tuir Komunidade Aldeia Manmera Joana da Conceição haktuir, produtu sira ne’ebe sira kuda hansan fehuk ropa, repoillu, koto no batar hetan estragus totalmente tanba udan tau bebeik no estragus mos hosi animal.
“Ami kuda modo metan repoillu fehuk ropa, kuandu udan mai la para aihan toos laran dodok hotu, tinan kotuk mos hanesan, tinan ne’e mos hanesan, aihan dodok hotu, ami la lori ba merkadu,” Joana da Conceição ba Lafaek News iha aldeia Manmera suku Mulo Hatu-builico foin lalais ne’e.
Joana hanesan toos nain triste, ho mudansa klimátika ne’ebé estraga hotu aihan iha nia toos laran, hanesan modo, kontas, talas, koto no seluk tan, labele lori ba merkadu hodi faan hetan osan selu oan sira nia eskola, tanba komunidade aldeia Manmera maioria dependensia makas iha agrikultura.
Iha fatin hanesan, Xefe Aldeia Manmera Afonso Verdial relata, realidade mudansa klimátika fo impaktu boot ba produsaun hahan local, komunidade sira labele transporta ba merkaduria tanba produtu ne’ebé komunidade sira kuda sai dodok estraga de’it.
“Produsaun tinan ida menus liu mak batar ho koto tanba estragus barak liu husi udan, foin moris mai udan tau makas koto no batar sira dodok hotu no animal fuik mos han batar iha raikuak, xefe suku dehan hatoo ona ba iha postu pois ba iha munisípiu maibé tooagora seidauk hetan informasaun, iha tinan ne’e ami seidauk hetan ajuda husi estadu hanesan hahán ruma, ba governu oinsá bele tau matan ba komunidade atu bele hetan netik aihan ruma ba iha populasaun sira nia moris,” autoridade local ne’e afirma.
Entretantu, xefe aldeia ne’e husu ba parte governu hodi tau matan ba komunidade sira ne’ebé ninia produto hetan estragus hodi kuidadu too atu sira bele kuda hahan lokal hanesan fehuk, repoillu, batar, koto no talas, dadus hudi aldeia Manmera ho total habitante hamutuk 5.56, maioria moris ho vida hortikultura.
Jornalista : Maria José
Editor : Agapito de Deus
