Lafaek News—Bainhira simu lian tatoli hosi jornalista Lafaek News, hatada iha kbiit laek faluk ho naran Francisco bolu estimadu “Avo Sico” ne’ebé moris mesak iha laletek oan povuasaun Lemorana okos hosi Uma Kreda Dare ne’ebé hamahan-an iha baraka kiik be falun ho kalen ferujen okos horik ho tahu dodok no rai uut wainhira tempu udan no bailoron.
Lia tatolin ne’e atu hatutan fodik hela halerik Avo Sico nian ne’ebé mes-mesak helik-an iha laletek aibubur-laran Dare okos, ema laiha atu hasee netik, maluk sira dook hosi nia sorin, lakon esperansa tan laiha oan no família, loron ba loron Avo Sico empresta karosa hosi nia belun di’ak sira ne’ebé sempre hasee malu hanesan família rasik, hodi tula nia ai-maran dudu tuir mota laran Maloa ba Dili laran atu haknauk netik dolar ida ou dolar rua hodi hatutan netik iis ho supermie falun ida ho foos lata 1 ba loron hitu nia laran.
Nune’e Jornalista Lafaek News haktuir realidade moris Avo Sico iha laletek Ai-bubur laran ne’e ba Na’in ba Kompania Risumali Unip Lda, Ermera Oan, Filomeno Ximenes “Makikit Ramelau” liu husi telefone, resposta ho di’ak tebes, no hatoo hela agradese ba lia tatoli ne’e ho resposta katak, “Ha’u bele tulun Avo Sico tuir ha’u nia kbiit rasik, no ita reja ba malu atu ita hotu hetan isin di’ak hodi kontinua tulun malu, ohin uituan aban bainrua sei barak liután tuir grasa maromak nian, sasan mundu ninia valor mak tulun malu, atu soin hirak ne’e bele iha valor iha reinu lalehan,” lia furak hosi nain ba kompania Risumali Unip Lda, Filomeno Ximenes “Makikit Ramelau” iha mota laran Maloa hafoin ajuda nesesidade natoon ho kalen uma nian ba Avo Sico, sábadu (05/04/2025), iha aldeia Lemorana suku Dare postu administrativu Vera-Crus munisípiu Dili.
Filomeno laiha lia-fuan barak iha momentu entrega material uma nian no nesesidade balun, nia hatoo de’it ba Avo Sico atu reja ba nia no reja ba malu atu bele dook hosi tentasaun no vingansa sira nune’e saúde di’ak nafatin hodi kontinua tulun mós maluk seluk ne’ebé presiza mos ajuda hanesan Avo Sico.
Avo Sico sente hanesan naroman foun ida ne’ebé forsa hodi dudu sees susar ne’ebé nia hasoru iha tinan naruk, hodi dehan “Ha’u reja ba maun atu hetan isin di’ak hodi tulun mos ha’u nia maluk sira seluk be moris hanesan ha’u iha Timor laran agradese ba maun nia di’ak ida ne’e mak valor iha boot bainhira ita mate ba iha maromak nia futar oin,” Avo Sico hatun lia ne’e hafoin simu material no nesesidade hosi nia maluk no belun foun Filomeno Ximenes.
Avo sico mos hatoo lia agradese wa’in ba jornalista Lafaek News ne’e, bele hatoo ona nia halerik ne’e ba Filomeno Ximenes, ikus Avo Sico hetan tulun, Avo Sico hatoo lia ikus ba nia belun foun ne’e katak, ajuda mos maluk seluk ne’ebé halerik hela hanesan ha’u iha lidun Timor, maromak bensaun no fo forsa ba oan Filomeno Ximenes nudar nain ba kompania Risumali Unip Lda, ne’ebé sempre tulun maluk sira ne’ebé presiza tulun hosi pandemia Covid-19 too ohin loron.
Antes atu fahe malu iha hosi fatin mota laran Maloa, Diretor kompania Risumali Unip Lda husu media Lafaek News atu kontinua hala’o kobertura ba asuntu social liu-liu defisiénsia, faluk no oan kiak sira ne’ebé moris susar hela iha sidade ninin areas rural iha territoriu tomak atu fanu ema hotu liu-liu maluk sira ne’ebé iha kbiit natoo bele ajuda malu.
Iha sorin seluk, reprezentante juventude no hanesan mos delegadu aldeia Lemorana, hatoo agradesimentu wa’in ba maluk Filomeno Ximenes bele ajuda sira nia komunidade iha aldeia ne’e, no ba da-daun autoridade local esforsu hela liu hosi trata dokumentus Avo Sico nian atu bele iha tinan oin asesu ba osan idozus nian.
Jornalista : Maria José
Editor : Agapito de Deus
