Lafaek News—Provinsia Hunan-Xina apoiu viatura ambulánsia multi-funsaun unidade 3 ba estadu Timor-Leste hodi hadi’ak servisu Ministériu Saúde (MS) iha munisípiu Manatuto.
Ministru Administrasaun Estatal (MAE) Thomas do Rosario Cabral iha diskursu hateten, doasaun viatura ambulánsia ne’e mai husi Provínsia Hunan Repúblika Popular Xina hodi hametin lasu amizade entre povu Timor-Leste ho povu Hunan.”
“Apoiu ida ne’e husi Povu Provínsia Hunan Xina ba povu Manatuto Timor-Leste, apoiu ne’e uluk sira asina tiha akordu iha tempu maun bo’ot Xanana momentu sei Prezidente Repúblika tanba la’e ema hanoin katak apoiu ne’e ba de’it Manatuto,” MAE Thomas do Rosario Cabral liu husi nia diskursu iha MAE Kaikoli, kinta (03/04/2025/.
“Doasaun viatura médiku ne’e hodi hametin koperasaun povu munisípiu Manatuto ho povu Provínsia Hunan kona-ba estabelesimentu akordu sidades amigas entre povu Hunan ho povu Manatuto, Aapoiu ne’e hanesan sidades amigas ka amizade tanba sira mai iha Timor-Leste iha 2008 hahu akordu entre povu Hunan ho povu Manatuto nune’e kontinuasaun ha’u asina akordu tolu no ikus ita halo komemorasaun 10 anus da koperasaun sidades amigas.
Governante akrsenta, fulan Outubru tinan 2024, Provínsia Hunan Repúblika Popular Xina fó apoiu ambulánsia 3 ba estadu Timor-Leste liu-husi Ministériu Saúde hodi dignifika serbisu saúde iha Ospitál Nasionál Guido Valadare (HNGV).
“Ambulánsia tolu simu iha fulan outubru tinan kotuk, iha ne’eba ita haree katak doasaun povu Provínsia Hunan ba iha Povu Manatuto, hanesan ohin embaixadór dehan ami propoin ba sira bele halo alargamentu mós ba Munisípiu balun no agora sira nia tékniku nain 8 iha hela Postu Natarbora Munisípiu Manatuto,Programa ida ne’e provínsia Hunan laos de’it ba Ministériu Saúde maibé sira apoiu mós ba area agrikultura no produsaun, nune’e nia parte husu ba autoridade munisípiu sira hamutuk ho komunidade kuidadu ho di’ak,” Cabral relata.
Tan ne’e, autoridade sira iha munisípiu mak tenki jere ema nia apoiu ne’e tanba ema sei halo fiskalizasaun hodi haree katak uza duni apoiu ne’e ba nesesidade ka lae, entaun autoridade sira fó hanoin ba povu Manatuto rasik hametin amizade inklui dezenvolve mos sira nia an, aleinde iha futuru povu Hunan sei mai vizita Timor-Leste iha dia seti (7) ekipa ida husi Hunan sei mai vizita Manatuto hakat liu ba area, Rembor nian oinsá atu halo interkámbiu amizade hodi hametin lasu sidades amigas no halo fiskalizasaun ba programa sira iha Manatuto.
Reprezentante Embaixador Xina iha Timor-Leste Xu Danyang hatutan, nia parte reprezenta povu provínsia Hunan hato’o agradese ba governu Timor-Leste tanba bele estabelese serbisu kooperasaun entre povu nasaun rua ne’e.
“Ba serimónia termu entrega viatura ami agradese ba Ministériu Administrasaun Estatál, (MAE) Ministériu Saúde (MS) Timor-Leste no Munisípiu Manatuto ne’ebé apoiu maka’as ba saúde entre nasaun rua ne’e, husi provínsia Hunan ho munisípiu Manatuto nu’udar realizasaun ikus husi koperasaun no reflete amizade husi povu Xina no povu Timor-Leste, relasaun amizade entre Xina ho Timor-Leste iha progresu bo’ot hodi hametin amizade entre provínsia Hunan ho distritu Manatuto sei besik liu tan, tuir komprimisiu akordu ne’ebé antes ne’e estadu rua funda ona,kooperasaun provínsial sai hanesan destake ida entre Xina no Timor-Leste iha area oioin, tanba nesesidade urjente povu Timor-Leste nian no mós reflete Xina nia apoiu ba Timor no firme ba dezenvolvimentu kuidadu mediku Timor-Leste nian signifika katak viatura sira ne’e bele ajuda hasa’e atendementu mediku iha munisípiu Manatuto”
Iha fatin hanesan, Prezidenti Autoridade Munisípiu Manatuto (PAM) Luis Fernandes reprezenta povu munisípiu Manatuto hato’o agradese ba governu Xina ne’ebé oferese ona apoiu ba povu Manatuto.
“Hodi populasaun Manatuto nia naran hakarak agradese ba governu Xina husi provínsia Hunan ne’ebé antes ne’e kria tiha ona amizade entre povu Hunan ho povu Manatuto iha tinan 10 ba kotuk agora atu tama ba tinan 11,ho doasaun ambulánsia tolu ne’e aumenta tan lista lubuk bo’ot ida ne’ebé munisípiu Manatuto simu ona husi Provínsia Hunan Repúblika Popular Xina iha tinan hirak ba kotuk hodi promove koperasaun provincial,” Luis Fernandes reafirma.
Entretantu, iha serimónia entrega viatura ambulánsia ne’e partisipa husi Ministra Saúde, Ellia Amaral, Ministru Administrasaun Estatál Thomas Cabral, Vise- Ministru Administrasaun Estatál, Jacinto Rigoberto, Sekretáriu Dezenvolvimentu Lokál, SEATOU no Prezidente Autoridade Munisípiu Manatuto (PAM).
Jornlaista : Moises Guterres
Editor. : Agapito de Deus
