Lafaek News—Aman hosi matebian Zezilma Verdial Gonçalves, hateten razaun famáilia matebian la simu desizaun tribunal iha primeira instánsia tanba familia sei iha kondisaun tristeza nia laran, matebian seidauk lori ba haloot, maibé rona katak prokuradora halo tiha ona julgamentu ba suspeitu hodi husik livre.
“Ha’u husu ba komandante atu haree faktus hirak ne’e, tanba membru PNTL ne’ebé fó sasin ne’e la loos “bosok” ha’u hanesan matebian nia aman presiza liu justisa ba ha’u nia oan feto, ha’u iha evidénsia lori ona ba keixa iha momentu suspeitu soke vítima ne’e. Ami familia sei iha kondisaun tristeza nia laran hela matebian sei hatoba hela iha uma seidauk lori ba halot, maibé ami rona ona katak prokuradora halo ona julgamentu ba suspeitu hodi husik suspeitu livre tiha, hanesan aman ida ha’u sente fuan rahun tan ne’e mak hanesan aman ha’u la simu ho desisaun hirak ne’e.” Dehan matebian Zezilma nia aman Jaime do Rego Goncalves Liu husi konferensia imfrensa iha Delta Quarta 02/04/2025.
Familia matebian Zezilma Verdial Gonçalves, hamutuk ho komite 12 de Novembru no Grupu Amizade de Resistensia(GAR), lamentavel hodi la konkorda total desizaun tribunal primeira instánisa nune’e familia husi juis atu verifika dadus lolos molok hatun desizaun atu labele kria insatifasaun hosi familia vítima no família suspeitu.
Aman hosi matebian Zezilma, Jaime do Rego Goncalves hateten, kronólojia lolos ne’ebé akontese resulta matebian Zezilma hetan soke iha zebra cross hodi hakotu-is, primeiru atu fó deklarasaun ba uluk iha polisia ne’ebé hateten katak, nia mak foti matebian Zezilma hodi lori ba ospitál ne’e la loos, “bosok” vítima monu ho distánsia ne’ebé dok besik metro 8 husi zebra cross, bainhira Zezilma monu nia maun mak halai ba foti no hetan ajuda husi mana ida maka tula iha kareta hodi lori ba kliníka Comoro (kampung baru) la’os ba HNGV to’o iha kampung baru, doutor sira labele atende ona hafoin transporta fali ba HNGV hodi vítima hakotu-is iha momentu ne’e.
Kronolojia lolos suspeitu soke vítima iha momentu ne’ebá sira mós hato’o keixa evidensia hirak ne’ebé iha ne’e lori hotu ba aprezenta maibé procuradora ne’e la hato’o provas ka faktus hirak ne’ebé iha ba juiz tan ida ne’e mak juiz foti desizaun ne’e haree ba parte ida deit hodi fó suspeitu ne’e livre.
“Ha’u husu ba prokuradora nomos ba sira seluk kuandu iha akontesimentu sira hanesan ne’e favor foti uluk dadus lai mak ita-boot sira bele foti desizaun se lae iha futuru mai mós sei nafatin akontese hanesan ne’e, tanba la iha provas no faktus ne’ebé imi hatudu no juiz rona husi parte ida deit, informasaun hirak ne’ebé koalia husi parte sira ne’e laloos, ami presiza lia loos ba matebian zezilma, nia mate ona sei la moris fali hanesan aman nia ezizensia ne’e mak justisa loos ba ha’u nia oan, ha’u la presiza osan, ha’u lakoi buka problema maibé ha’u presiza justisa ne’ebé loos, ha’u presiza lia loos ba ha’u nia oan feto mesak ne’ebé mate ona.” Relata matebian Zezilma nia aman
Nia reafirma, uluk luta ba buka justisa no lia-loos ba rai ida ne’e, maibé ikus akontesimentu ba Zezilma justisa ida ne’e la fó apoiu ba vítima, tan ne’e nafatin husu ba iha prokuradora, husu ba tribunal, vítima mate ona sei la moris fali, maibé familia hakarak buka justisa buka lia-loo ba vítima, tanba se familia la ezije hela de’it ema iha osan bele sosa justisa tan ne’e familia nafatin hamrik iha firme hodi buka lia-loos ba Zezilma.
“Ha’u nafatin husu ba iha komandante polisia nian atu investiga lolos membru PNTL ida ne’ebé sai ona sasin hodi fó informasaun ba iha procuradoria hodi foti desizaun ba parte ida deit, tanba tuir lolos polisia labele sai sasin, tanba kronolojia hanesan ohin konta ona ne’e bainhira matebian hetan soke iha zebra cross matebian nia maun ida nia tuir ne’e ho ami mak lori ba ospital iha ne’ebá la iha polisia ida depois matebian seidauk lori ba HNGV maibé lori uluk ba iha klinika kampung baru labele ona mak foin halo transferensia ba HNGV to’o iha ne’eba la bele salva ona ikus zezilma tenke hakotu-is.” Esplika Jaime do Rego Goncalves
Iha konferénsia imprensa ne’e, Prezidente Interinu komite 12 de Novembro, Filipe Rodrigues Perreira hateten, komite 12 de Novembru no Grupu Amizade de Rejisténsia durante ne’e simu informasaun no rekoilla mós informasaun relasiona ho dezastre ne’ebé akontese no resulta Zezilma hakotu is “mate fatin” dezastre ne’e akontese iha tuku 8:20.
Jornalista : Moises Guterres
Editor : Agapito de Deus
