Bobonaru-(Lafaek News)-Komandante Tránzitu munisipiu Bobonaru, Sarjentu Xefe, José Bereviti informa, komandu Polisia Nasional Timor-Leste (PNTL), Bobonaru hahú husi janeiru too Novembru ohin rejistu kazu asidente trafegu hamutuk 57.
“Hahu husi fulan janeiru to’o agora PNTL Bobonaru rejistu kazu asidente trafegu hamutuk 57, mate nain 4 no seluk kanek kmaan no balu kanek todan, sira ne’e barak liu mai husi motor ho motor soke malu,” dehan komandante tránzitu bobonaru José ba jornalista iha nia knar fatin Maliana Bobonaru, kuarta 11/11/2020.
Sarjentu Xefe, José Bereviti deklara, motorizada ne’ebé hetan asidente trafegu balun too agora sei paradu hela iha edifisiu komandu Bobonaru.
“Durante ne’e motorizada ne’ebé maka hetan asidente trafegu balun seidauk foti tanba dokumentus la kompletu no balun la iha dokumentu transporte,” Komandante ne’e esplika.
Nia dehan, dezafiu ne’ebé durante ne’e polisia tránzitu munisipiu bobonaru hetan mak hanesan menus transporte ba membru tránzitu sira atu halo sira nia servisu.
Nune’e mos Komandante Tránzitu Bobonaru, Sarjentu Xefe José Bereviti soares iha nia parte, husu motorista sira bainhira halo movimentu iha dalan publiku tenke lao tuir regulamentu tránzitu nian ne’ebé iha.
“Husu ba motorista sira ne’ebé konduz motorizada no kareta tenke kuidadu aan halai tranporte ho velosidade kiik no mos tenke iha dokumentus transporte inklui mos karta kondusaun kareta ho motor nian tenke iha nune’e ita bele evita asidente trafegu iha futuru,” nia rekomenda.
Jornalista : Orlando Magno
Editora : Nelya Barros
