Bobonaru-Lafaek News-Komandante Tránzitu Munisípiu Bobonaru, Sarjentu Xefe, José Bereviti Soares, informa iha durante fulan Outobru tránzitu Prende transporte públiku hamutuk 55.
“Fulan outobru ne’e ita prende transporte hamutuk 55, motorizada 51 kareta bus 4, bus nia infrasaun mak sira tula no hatun pasazerus laiha nia fatin no motorizada sira ne’e ita prende tanba dokumentus balun la kompletu,” dehan Sarjentu Xefe José iha nia knaar fatin komandu Bobonaru, 11/11/2020.
Nia relata, motorizada ne’ebé da-daun ne’e para hela iha liur balun husi kedas tinan 2016 to’o agora nain sira la mai foti, maibé motorizada balun hetan asidente trafegu.
Sarjentu Xefe José deklara, bainhira motorist sira selu depende ba sira nia infrasaun hanesan la uza kapasete mínimu selu osan $.6 (dolar ne’en), ba leten tuir lei tránzitu nian.
Laeinde husi pasa ravista nian PNTL munisípiu Bobonaru hala’o hahú iha janeiru to’o outobru kobre osan ba kofre estadu hamutuk osan $.7.652, nune’e tránzitu munisípiu Bobonaru iha ona planu atu halo sensibilizasaun ba estudante sira kona-ba lei kódigu estrada nian ba eskola sira iha kapital Maliana, tanba da-daun ne’e minoridade mos lori ona motorizada.
“Sira hanoin katak sei ki’ik entaun sira la bele uza kapasete maibé la hatene katak bainhira monu ne’e sira nia ulun rahun hotu tanba ne’e mak ita tenta nafatin atu halo sosializasaun iha eskola nune’e estudante sira bele komprende konaba lei kodigu Estrada,” nia afirma.
Jornalista : Orlando Magno
Editora : Nelya Barros
