Lafaek News—Presídente Komite 12 Novembru, Grigório Saldanha, husu governu tenke kumpre promesa harii monumentu 12 de Novembru iha Santa Krús hodi troka naran Jardin 12 Novembru ba Sebatião Gomes.
“Husu nafatin governu hari’i ona monumentu Masakre Santa Krús, hanesan memoria akontesementu iha fatin lulik ida ne’e, tanba kleur demais ona mezmu governu troka malu, maibé fatin ne’e seidauk troka buat ida,” dehan Presídente Komite 12 Novembru, Grigório Saldanha, ba jornalista sira iha ámbitu komemorasaun 12 Novembru iha Santa Krús, kinta, (12/11/2020).
Prezidente komite 12 de Novembru esplika, prosesu la’o hela katak konkursu la’o, maibé se maka bele garante katak fatin ne’e maka ne’e ona atu halo konstrusaun, importante maka konstrusaun hahú.
“Prossesu la’o ne’e kleur ona, hanesan imi hare’e halo lansamentu husi Dr. Ramos Horta sei presidente Presidente lansa kuadro ne’e atu hari’i monumentu mas tinan hira ona, no mos iha tuir fali presídent republika Dr. Taur Matan Rauk halo lansamentu primeira pedra mas nunka la’o, mas agora ne’e atu la’o mas se maka bele garante la’o ne’e tinan oin mai hari’I ona,” dehan Presidente Komite.
Nia relata, kona-ba BOQ aprezenta ona no governu aprova ona tanba ne’e, konkursu ne’e komite hein nia kontinuidade atu hahú ona hari’i más presiza orsamentu, maibé ne’e governu nia kompeténsia.
Alende ne’e presídente komite 12 Novembru ne’e husu nafatin governu atu kumpre nia promesa hodi troka naran jardin 12 Novembru Motael ba Jardin Sebatião Gomes hodi evita negasaun fatin istóriku.
Jornalista : Pedro de Almeida
Editora : Nelya Barros
