Lafaek News—Populasaun husi suku Uatu-Haco ho Uaioli postu administrativu Venilale, munisípiu Baukau ezijé governu sentrál atu hadi’a hadi’a kondisaun Estrada iha suku rua ne’e ne’ebé sai problema dezde okupasaun Indonézia too ohin loron susar atu lori produtu lokál ba asesu iha merkadu.
Reprezentante komunidade aldeia Osso-Gori suku Uatu-Haco, Paulo Antonio Varela, husu governu liu husi ministériu obras publikas atu hadia ona Estrada ba suku kompostu husi Uatu-Haco ho Uaioli atu fasilita vida agrikultores sira lori sira nia produtu ba merkadu.
“Estrada imporante la halimar ba ita, iha tempu bai-loron ita bele asesu maibé iha tempu udan ne’e susar tebes atu asesu, no ami la husu buat barak importante maka Estrada,” dehan reprezentante komuniadde Osso-Gori, Paulo Antonio Varela ba lafaek news, iha aldeia Osso-Gori foin lalais.
Nia esplika, populasaun iha aldeia Osso-Gori suku Uatu-haco iha ne’ebé vizinus ho suku Uai-Oli asesu ona bee no eletrisidade maske iha problema ,maibé Estrada kondisaun Estrada la favorese ba povu agrikultor sira atu asesu.
“Ami povu la husu osan maibé esensial liu maka Estrada, se ita lori de’it to’o merkadu sasan dodok hotu ona entaun ema la sosa, ne’e ita kole saugati de’it, mas kuandu estrada di’ak povu mós moris di’ak no bele asesu ba merkadu entaun komunidade sira badinas kuda modo no pordutu sira seluk,” dehan nia.
Nune’e mós nia relata, ho problema estrada komunidade servisu voluntariamente halo estrada husi area Uai-Naula no fóti mós dadus no halo proposta ida hato’o ona ba MOP atu prioritiza iha OJE 2021.
“Ami nia proposta hatama ona, se bele avalia no iha tinan 2021 bele hadia ami nia Estrada, i ami rekomenda tan dala ida katak ami husi aldeia osso-gori suku uatu-haco ninian no iha proposta ne’e ami tau dadus kompletu tan ne’e se bele hare’e no tinan oin mai bele hadia nune’e iha tempu udan ka bailoron ami bele asesu nafatin Estrada,” infórma.
Relasaun ho problema estrade iha suku rua ne’e parte Ministériu Obras publikas (MOP) tuun direitamente ona iha area remotas hodi hala’o reuniaun hamutuk ho lideransa komunitáriu kompostu husi suku Uai-Oli, Uatu-Naco ho Uai-Laha, atu hare’e ba problema sira ne’ebé populasaun infrenta.
Jornalista : Pedro de Almeida
Editora : Nelya Barros
