Lafaek News-(Baukau)-Kandidatu Prezidente Repúblika númeru sorteiu 1, Premiadu Nobel ba Paz, José Ramos Horta, afirma bainhira simu fiar husi povu sei tun ho ekipa sei vizita hikas suku Seical atu haree poténsia saida mak bele investe.
Horta hatoo asuntu ne’e hafoin hala’o diálogu ho populasaun suku Seical postu administrativu Laga munisípiu Baukau, sesta (08/04/22), atu fo hanoin militantes no simpatizantes partidu CNRT ho nia aliadus sira inklui movimentu hotu ne’ebé apoiu nia hodi prepara ba eleisaun loron 19 fulan Abril ne’e.
Ha’u sei mai vizita hamutuk ho maun-boot Xanana no embaixadór sira atu haree oinsá mak bele mak haree poténsia investimentu iha Seiçal ho Laga atu bele loke kampu servisu no hadi’a povu nia ekonomia ne’ebé susar tebes-tebes ohin loron,” Ramos-Horta hateten iha ambitu Dialogo ho Komunidade Suku Tekinomata-Laga ho Suku Seiçal, Sesta,(08/04/2022).
Iha diálogu ne’e, José Ramos Horta hala’o ho populasaun suku Tekinomata-Laga ho Suku Seiçal, akompaña husi ekipa partidu CNRT no kuadru Partidu Libertasaun Popular (PLP), Custodio Belo “Alin Laek” atu konsolida hanoin hamutuk hodi deside distinu nassau Timor liu husi eleisaun atu hili prezidente repúblika ida ne’ebé iha esperiensia nakonu hodi failansu balun ne’ebé akontese no lori ona impaktu ba povu kiik durante tinan hat nia laran.
Iha ámbitu diálogu ne’e kandidatu prezidente súmeru 1 ne’e promete ba populasaun suku-rua ne’e katak bainhira hetan lejitimidade iha loron 19 fulan Abril sei servisu maka’as ho governu atu bele hadi’a ekonomia povu iha rai ne’e.
Premiadu Novel da Paz Ramos-Horta nota iha tinan haat nia laran ne’e, ekonomia povu no nasaun iha naha todan boot ida ne’ebé kauza husi impase polítika no violasaun konstituisaun ne’ebé komete husi atual Prezidente Repúblika, Francisco Guterres “Lú Olo” ho VIII Governu Viabiliza husi partidu FRETILIN.
Diplomata senior ne’e afirma, servisu ne’ebé nia sei hali iha tinan lima mai ne’e mak dezafiu boot ne’ebé maka povu ho nasaun nia ekonomia hakdasak hahú husi 2017- 2022, sei servisu ho governasaun foun oinsá bele renormaliza ekonomia ne’ebé hakdasak hela.
Ema balun iha ukun dehan, ekonomia di’ak hela tanba sira la sente saida mak povu sente agora. Sira la sente ne’e tanba kada fulan sira simu hela osan no subvensaun sira seluk husi Estadu no husi povu nia osan” tenik nia
Ramos-Horta husu, iha eleisaun prezidensiál, 19 Abríl ne’e, povu tenke matenek atu hili Prezidente Repúblika ida ne’ebé matenek hodi bele hadi’a hikas imajen Timor-Leste iha mundu internasionál no hametin fali relasaun internasionál hodi konvense hikas investór internasionál maiinveste ba Timor atu bele kria empregu ba foin-sa’e sira.
Premiadu Nobel ba Paz ne’e mos relata, ema balun ne’ebé agora tuun ba halo kampaña atu hanesan fali kampaña ba eleisaun parlamentar, hodi soe propaganda polítika no kompromisu polítika atu fó subsídiu ba kada uma-ka’in $.200.00.
Sé kuandu hakarak fó bainhira povu ne’e moris iha susar nia laran, kalamidade 04 Abríl 2021 no aumenta tan ho sasán nia folin agora sa’e maka’as, Governu bele fó de’it ona. La’ós promete osan hodi buka votu husi povu”Horta koalia ho hamnasa.
Ikus liu, kandidatu prezidente repúblika Ramos Horta ho esperansa boot maioria populasaun suku rua ne’e sei fó votu konfiansa ba nia iha eleisaun segunda volta hodi lori mudansa no hadi’a hikas povu nia moris.
Jornalista : Agapito de Deus
Editor : Agapito de Deus
