Lafaek News–Eis Prezidente Repúblika, Jose Ramos Horta, husu husu oitavu governu konstitusionál atu rekoñese PNTL no F-FDTL nia servisu.
Horta relata, seguransa iha Timor-Leste hanesan servisu iha liña oin hanesan polísia no forsa armadas seidauk iha fasilidade ne’ebé di’ak atu fasilita sira nia servisu iha area seguransa nian.
“Dala barak ita la rekoñese polísia nia servisu no estadu rasik mos la rekoñese forsa armadas nia servisu iha rai laran,” dehan Horta liu husi nia diskursu iha serimonia graduasaun Diploma jestaun Ezekutiva Polísia (DIP-JEP) iha Sentru Formasaun Polísia Komoro Dili, Sesta 22/01/2021.
Eis Ministru Negósiu Estranjeiru no Kooperasaun ne’e dehan agora ho orsamentu boot governu tenke tau prioridade no haree nesesidade umanu ba parte seguransa hanesan PNTL no F-FDTL nia ekipamentus atu fasilita sira.
Horta dehan, haree liña polísia no forsa armadas nu’udar ema sira la’os mákina no la’os Robot, maibé sira mos iha familia no iha nesesidade oi-oin tanba ne’e presiza apoiu emosional no apoiu pesikolójiku.
“Apoiu ba sira nunee polísia ho forsa armadas sira bele orgullu ho nia Farda diak, sepatu diak, Sintu diak no nia transporte diak tenke apoiu mos sira nia nesesidade ne’ebé presiza atu ajuda,” Horta sujere.
Jornalista : Orlando Magno
Editora : Nelya Barros
