Lafaek News—Premeadu Nobel da Paz no eis Prezidente Repúblika, Jose Ramos Horta, hateten iha nia parte sente preokupa tebes ho governu ne’ebé seidauk kria fatin tratamentu saúde espesial ba Polísia Nasionál Timor-Leste (PNTL) no Falintil Forsa Defeza Timor-Leste (F-FDTL).
Nia afirma, bainhira PNTL ho Forsa Armadas sira iha difikuldade saúde tenke iha fatin espesial ba sira iha atu halo tratamentu, maibé labele halo sira dudu malu fali iha ospitál Nasionál Guido Valadares.
“Governu tenke kria fatin saúde ba polísia no forsa armada sira, ida ne’e mak ita hatudu preokupasaun no hadomi ema ne’ebé servi ba povu hanesan mos lotu ba nasaun,” dehan Horta liu husi nia diskurau iha Serimonia graduasaun Diploma Jestaun Ejekusaun Polísia iha Centru formasaun Polísia (CFP), Komoro Dili, Sesta 22/01/2021.
Horta relata, tuir informasaun ne’ebé nia rona katak, Xina mak atu oferese fatin ida ne’e mos extende ba polísia no forsa armadas, tanba polísia tenke iha tratamentu espesial la’os haruka sira hein fali iha ospitál nasionál públiku ne’eba.
“Kada elementu PNTL ho Forsa Armada halo ona check up kompletu ne’e di’ak maibé kuandu rezultadu mai tiha tenke halo follow up katak moras ka problema iha isin lo-lon ne’e tenke halo oinsá,” nia esplika.
Horta rekomenda, governu presiza tau prioridade ba saúde PNTL no F-FDTL, liu-liu moras nehan presiza ema dentista atu halo tratamentu tanba moras mosu husi ibun ho nehan, maibé iha Timor Leste maioria ema seidauk hatene kona-ba kestaun ne’e.
Jornalista : Orlando Magno
Editora : Nelya Barros
