Lafaek News—Estudante hosi Eskola Sekundaria Jerál (ESJ) 4 de Setembru preokupa tebes ba fasilidade ne’ebé estabelese iha eskola, tanba la to’o ba estudante sira atu aprende ho di’ak.
iha entrevista estudante Carminda da Costa Cruz, espresa ho sentimentu triste tanba fasilidade eskola menus liu hanesan meza, kadeira, sala de aulas inklui haris fatin, ho problema ne’e susar ba estudantes sira atu aproveita oportunidade ne’e ho di’ak, razaun númeru estudante barak liu.
“Ha’u nu’udar estudante sente triste tebes, tanba eskola públiku ida ne’e ezije atu fasilita ami joven sira atu aprende la’os mai atu halerik no hasoru problema hanesan agora dadaun akontese, meza laiha kadeira mós laiha, ne’e la’os foin akontese maibé tinan-tinan sempre akontese,” dehan Estudante Carminda da Costa Cruz, ba jornalista lafaek News, iha resintu eskola 4 De Setembru Balide Dili, sesta, (22/01/2021).
Estudante ne’e mós kestiona ukun nain sira sempre anunsiu katak jerasaun foun maka futuru ba nasaun nian no presiza aprende no estuda makas, maibé relidade eskola públiku sira hasoru problema oin-oin liu-liu fasilidade, difisil tebes estudante atu aprende ho dignu.
“Durante ne’e fasilidade ba ami estudante sira menus liu, ita hotu hatene katak ami jerasaun foun maka sai dezembolvimentu ba nasaun iha futuru, tanba-sa maka ami estudante sira sempre hasoru problema ida ne’e, eskola públiku ne’e katak oportunidade di’ak atu Aprende,” dehan Nia.
Diretór ESJ 4 de Setembr, Sergio Alfredo da Crus.
Entertantu Diretór Eskola Sekundáriu Jerál (ESJ) 4 de Setembru UNAMET, Sergio Alfredo da Crus, haktuir nia parte rekoñese fasilidades ba eskola ida ne’e menus liu-liu meza, kadeira, haris fatin inklui portaun eskola.
“Durante ne’e ha’u haree kondisaun eskola ne’e menus liu ba fasilidade, ita hare’e númeru estudante iha sala ida hamutuk nain 81, tanba aula lato’o no estudante sira ne’e lafokus atu aprende ho di’ak,” hatete Diretur.
Jerente eskola ne’e rekomenda ba ministériu edukasaun atu atensaun ba fasilidades eskola nian ne’ebé menus tebes, di’ak liu MEJD bele mós tuun direitamente atu hare’e ba kondisaun eskola refere inklui eskola iha territóriu laran.
“Ha’u hanesan diretór ba iha eskola ne’e, husu ba ministériu edukasaun atu tun ba baze hodi bele haree ba eskola hotu, tanba eskola barak sei hasoru problema, ita hotu hatene katak juventude maka sai autor ba dezembolvimentu nasaun ne’e rasik,” nia informa.
Entretantu, estudante ne’ebé hala’o nia estudu iha Eskola Sekundariu Jerál (ESJ) 4 de Setembru kompostu husi primeiru anu to’o treseiru anu hamutuk ema na’in 3898, inklui professo hamutuk na’in 114 maka sei ativu iha eskola refere.
Jornalista : Sabina S. /Joselina dos Santos.
Asisten Editór : Pedro de Almeida
