Lafaek News—Kuarta (01/03/2022), Prezidente Repúblika José Ramos-Horta enkoraja Empreza Timor Resource nafatin kontinua ho investimentu perfurasaun mina ne’ebé halo iha tasi mane tanba investimentu ne’ebé boot oras Timor Leste iha ho rekursu naturais ne’ebé iha bele fó kontribuisaun maka’as ba ekonómia nasaun nian.
“Xefe Estadu enkoraja nafatin Timor Resource atu kontinua ho investimentu ne’ebé halo iha tasi mane tanba ida ne’e hanesan investimentu ida ne’ebé boot oras ne’e daudauk Timor Leste iha no ho rekursu naturais ne’ebé iha bele fó kontribuisaun maka’as ba ekonómia nasaun nian,” Country Manager husi kompañia Timor Resource, Filomeno de Andrade, hafoin remata enkontru ho Prezidente Repúblika José Ramos-Horta iha Palasiu Prezidensiál Bairu pite, kuarta (01/03/2023
Xefe Estadu fó enfaze maka’as no sujestaun atu empreza Timor Resource kontinua halo esforsu hodi hakat ba oin a oinsá bele atinji objetivu ba iha perfurasaun ba mina matan sira ne’ebé oras ne’e daudaun Timor Resource halo hela.
“Ami ko’alia kona-ba situasaun ne’ebé mak oras ne’e informa mós katak Timor sourse halo hela perfurasaun iha mina matan tolu, mina matan tolu ne’e resultadu ne’ebé mak kompañia hetan fó korajen makas tebetebes atu bele kontinua atividade”.
Entretantu tuir Empreza Timor Resource, Mina matan tolu ne’ebé mak oras ne’e dadaun to’o ona metru rihun tolu atus ida, informasaun ne’ebé mak hetan ne’e atu fó korajen maka’as, atu hodi remata perfurasaun ne’ebé planu atu to’o iha metru rihun tolu atus lima, ida ne’e mak semana ida ka rua remata, depois hala’o hotu ona atividade teste ba mina matan ne’e hodi haree kapasidade ba ida ne’e.
“Laran haksolok tebetebes ho informasaun resultadu ne’ebé mak ami hetan ne’e, maibé informasaun ikus hodi kuantidade ne’ebé mak iha ne’e sei hato’o ba MPM depois sira mak sei hato’o informasaun”.
Mina matan oras ne’e dadaun iha parte Suai nian, Suai ami halo perfurasaun mina matan tolu ida iha Matai, Kamanasa, Labarai ikus liu klean tebetebes, ne’e mak iha Labarai ne’e metru rihun tolu atus lima nian, maibé agora ami to’o ona rihun tolu atus ida.
“Resultadu, ami tuir dadus husi Geologia ne’ebé mak hetan ne’e resultadu fó korajen tebetebes mai ami atu bele kontinua halo perfurasau, resultadu lololos sei hein hela teste ne’ébe mak halo, oras ne’e dadaun preparativu atu halo teste ba iha mina matan ne’e atu bele haree kapasidade hira mak iha ne’eba, maibé resultadu loloos ne’e sei informa ba MPM depois sira mak sei hato’o informasaun ne’e”.
Jornalista : Rita Moniz
Editór : Agapito de Deus