Luciano dos Santos
Lafek News—Obrigadu tenke deside fan uma ne’ebé hamahan loron ho kalan no motorizada ne’ebé hatutan ain ba dook ho besik, tan de’it hakarak kontribui ba dezenvolvimentu iha setór indústria transformasaun tasi-ben nakfilak ba bee mós no fó servisu ba joven sira iha area Maubara.
Tuir istória iha inísiu transformasaun ne’e sente difisil tanba laiha osan no laiha mós apoiu husi parte relevante, hanoin ba mai la di’ak, Timor oan ida ho naran Luciano do Santos Pereira, ne’ebé iha espíritu nasionalista ne’ebé as obriga nia hanoin deside fan uma ho motor atu harii de’it uma laboratóriu hodi transforma tasi-been sai bee mós.
Timor oan ne’e mós iha vizaun ne’ebé luan hakarak Timor labele tane liman bei-beik ba bee importadu husi rai lur, maski bee iha Timor sulin ba rai leten laiha folin, tan ne’e see la’os ita see tan, see la’os agora bainhira tan, tenke hatudu ona kreatividade no matenek joven nian iha era ukun an ida ne’e.
“Ha’u fan uma ho motor tan ami presiza osan ho montante ne’ebé bo’ot atu sosa ekipamentus sira tan ne’e ha’u tenke faan duni motor (CBR) ho nia folin $1.000 no uma ne’ebé ha’u fa’an ho nia folin $3.000 ho nia medida (10×11) uma ne’e rasik hau nian” dehan, Luciano ba Lafaek News Iha Likisá (13/08/2020).
Entretantu fundo ne’ebé hetan la’os kontribui de’it husi fundador sira maibé iha mos komunidade sira no familia nia apoia kooperativa ne’e hahu distribui ona rezultadu husi servisu sira ba iha merkadoria
“Komunidade fo apoia ba ami nia koperativa ne’e hamutuk $4.000 no iha familia balun ne’ebé suporta ho montante $10.000 fundo sira ne’e atu hola ekipamentu sira ne’ebé uja hahu husi prosesu servisu no familia rasik oferese rai ne’e ami hodi halao koperativa ida ne’e”
Nia haktuir dadaun ne’e kooperativa fo ona servisu ba joven sira hamutuk nain sanulu iha kooperativa refere no iha planu atu alarga tan ba munisípiu sira iha Timor laran tomak
“Ami nia kooperativa ne’e fo servisu ona ba joven sira hamutuk ema nain sanulu resin inklui mos ami fundador sira ne’ebé mak funda koperativa ne’e rasik tamba ne’e ami espera katak ho ami nia esforsu tomak sei bele tulun mos joven sira atu kria rasik kampu servisu ba nia aan” dehan nia.
Jornalista : Anselmo Monteiro
Editora : Nelya Barros
