Likisa (Lafaek News)-Estudante finalista Universidade Nasionál Timor Loro sa’e (UNTL) Departamentu Kímika utilize teoria ne’ebé aprende hatudu iha realidade,transforma tasi-been nakfilak sai bee mós.
Luciano dos Santos, idade (26) nu’udar inisiatór no peskizador ba indústria ne’e, hateten antes hahú halo peskiza ba tasi-been atu transforma ba sai bee mós la’os servisu ida ne’ebé fasil, maibé prezisa pasiénsia hasoru laloran hafoin hatudu rezultadu pozitivu.
Inisiatór ne’e esplika, peskiza ba tasi been durante tinan 3 hahú 2017-2019, hafoin hahú konstrusaun fíziku ba obra transformasaun hanesan laboratóriu no prepara material sensitive ne’ebé ligadu ho obra refere.
Luciano dos Santos Pereira, moris iha aldeia Raeme, suku Watuwou, Postu-administrativu Maubara, munisípiu Likisá ho idade (26) hamutuk ho nia maluk estudante na’in ualu husi Universidade da Paz produz tasi-been nakfilak ba bee hemu.
Ideia ne’e hamosu husi nia dosente no ikus mai utiliza idea ne’e koko atu hili tema ida ne’e sai ba tema monográfia atu kompleta rekezitus balun iha universidade hodi hasai kursu lisensiatura maibé no fin peskiza ida ne’e sai susesu no hetan rezultadu ne’ebé di’ak ba sosiedade no ba nasaun.
“Prosesu ida ne’e la fasil tamba ami sente hanesan hasoru laloran boot ida, ita presiza estudu ida ne’ebé klean no halo peskiza kona-ba fatuk sira iha tasi laran no oinsá mak fila tasi been ne’e sai ba bee hanesan bai-bain,” dehan, Lusiano, ba Lafaek News iha Watuwou, (10/08/2020).
Obra ne’e hala’o husi estudante finalist kompostu husi fakuldade edukasaun departamentu kímika husi Universidade Nasionál Timor Loro sa’e (UNTL) hamutuk harii kooperativa Nurak Sulin Hamutuk (K-NSH) produs tasi-been sai bee konsumu iha aldeia Raeme, suku Watuwou, postu administrativu Maubara, munisípiu Likisá.
“Fo-foun ha’u rasik atu hatama tópiku monográfia atu hasai lisensiatura nian,iha dosente ida husi Viqueque ne’eba nia hateten mai ha’u, iha Likisá tasi barak nusá mak o la halo tasi-been ne’e ba bee mos, entaun hau rasik ba buka referensia no hatudo ba dosente refere no ha’u koko estuda teoria balun ne’ebe mak matenek nain sira ko’alia no iha ligasaun ba produsaun tasi been sai bee no ha’u koko halo peskiza iha fatin ne’e,” katak nia.
Nia informa, montante osan ne’ebé mak gastus ba servisu ne’e hamutuk $18 mil husi total ne’e konta hahu husi inisiu too finaliza obra refere.
“Ami nia nia inan aman la servisu iha eskritóriu hanesan ema seluk maíbe ami halo kréditu ba iha banku no laiha ema ida ka kompana ida mak finansia ami hahu husi inísiu too mai iha agora, maibé osan ne’e mai husi kedas ami ne’ebé nain ualu ami kontrubui osan,” nia dehan.
Entretantu obra ne’e inisia iha tinan 2017 kompostu husi ema na’in ualu no obra ne’e rasik nia produtu hahú tama iha merkaduria hanesan kioske kiik-oan hamutuk sanulu ne’ebé sai kliente hodi fan bee galon ne’ebé kooperativa ne’e rasik produs.
“ami loron ida produz bee galon hamutuk atus ida no bee galon ne’e marka ho naran TASI LIQUSA É MÔ maibé ne’e depende ba kliente sira ne’ebé mai husu, no ezistensia ami nian too agora seidauk iha kliente ida mai keixa dehan bee ne’ebé produs husi ami nia koperativa ne’e ular ka ladi’ak ba sira nia saúde too agora seidauk regista,” dehan nia.
Produsaun be galon ho naran TASI LIQUSA É MÔ ne’ebe Prontu ona atu distribu ba Kioske sira iha Municipiu Likisa,Segunda (10/08/2020) Foto TP Acacio Pinto : lafaek News
Entretantu koperativa ne’e rasik hetan inaugurasaun husi sekretáriu estadu meiu ambiente no Sekretáriu Estadu Kooperativa iha loron 20 fulan Dezembru tinan 2019.
Jornalista : Anselmo Monteiro
Editora : Nelya Barros
