Lafaek News—Vise Ministru Interior (V-MI), Antótnio Armindo, sesta (15/01/21), hasoru malu Primeiru Ministru (PM) no Ministru Interior (MI), Taur Matan Ruak, hodi diskute movimentasaun illegal iha terrestre no maríitima atu bele kontrolu másimu.
“Ita planu hela liu-liu atu asegura ita nia fronteira terrestre no mós maritima, durante iha situasaun moras Covid-19 ne’ebé numeiru sa’e makas iha nasaun vijinu Indonesia,” dehan VMI Antótnio Armindo, ba jornalista sira hafoin enkontru ho PM-MI iha palasio governu, sesta, 15/01.
António informa, Ministériu Interior, dsikusaun ona ho Komadante Jerál Polísia Nasionál Timor Leste (PNTL) Komisáriu, Faustinho da Costa Hornay, hodi koordena ho Komadante Unidade Polísia Fronteira (UPF) no mós komadante Munisípiu atu servisu hamutuk hodi asegura.
“Ita preokupa kona-ba ida ne’e, iha orseik-horibainrua ita ko’alia ona ho komisáriu, komisáriu mós ko’alia ona ho komandante UPF ho komadante sira iha munisípiu atu bele servisu hamutuk hodi asegura ita nia Fronteira sira,” tenik V-MI.
Vise ministru ne’e fundamenta, planu asegura fronteira liu-liu fatin ne’ebé UPF identifika hanesan fatin movimentu ilegal barak, nune’e bele koloka iha ne’eba atu asegura, ema labele tama-sai.
“Ita hatene katak ema halo movimentu ilegal ne’e lori risku mai iha timor leste, ita husu para sidadaun hotu-hotu iha konsensia tomak atu labele halo movimentu ilegal, tanba movimentu ilegal ne’e la’os dalan ne’ebé maka di’ak, se halo mivimentu ilegal sei lori risku rasik ba ita nia rai, tanba ida ne’e hotu-hotu iha konsensia ba para labele halo movimentu ilegal,” nia esplika.
Iha sorumutu ne’e tuir vise ministru katak aprezenta mós servisu ministériu interior nian durante semana ida ba Primeiru Ministru.
Jornalista : Pedro de Almeida
Editora : Nelya Barros
