Lafaek News—Governu liu husi Ministériu Interior (MI) iha ona koordenasaun sei loke fronteira terrestre iha loron 20 fulan Janeiru ba estudante Timor-oan iha konsuladu Atambua fila mai Timor-Leste.
Vise Ministru Interior Antótnio Armindo, hatete iha koordenasaun di’ak entre ministériu Interior ho Ministériu Negósiu Estranjeiru Kooperasaun (MNEK) ho Ministériu Saúde (MS), hato’o, asuntu ne’e hafoin hasoru malu ho Primeiru Ministru (PM) Taur Matan Ruak, iha palasiu governu.
“Ita deside ona katak sira sei fila fali mai, sei loke fronteira uniku ba sira para sira tama mai, tanba agora sira iha hela konsuladu, maibé tenke la’o tuir protokolu saúde públika nian para atu nune’e labele foti risku mai Timor-Leste, ita konkorda ona no iha dia 20 fulan ne’e, pelu menus loke oras ida ou rua hanesan nepara sira bele tama mai depois sira ba karantina, inportante maka tenke halo tuir saúde púlika nian ne’e inportante liu,” Antótnio Armindo, ba jornalista sira iha palasiu governu, sesta, 15/01.
Vise ministru relata, antes ne’e mós deputadu husi bankada PLP Abel Pires, dehan estudante barak maka hela iha Konsuladu Atambua, kuandu situasaun Covid-19 kontinua sa’e makas iha atambua fo risku no inpaktu negativu ba estaf no estudante sira, maske fronteira taka maibé buka dalan atu resolve.
“Ha’u konkorda katak fronteira taka tiha ona, maibé situasaun hanesan ne’e oinsa buka dalan resolve ida ne’e, tanba sira iha ne’eba susar tebe-tebes, staf sira menus kondisaun mós ladun di’ak, sira labele dehan lae ba estudante, tanba sira timor oan sira atu halai ba ne’ebé, tan ne’e husu MNEK no MS atu hare’e,” dehan deputadu Abel Pires.
Nune’e mós, Minístra Negósiu Estranjeiru Kooperasaun (MNEK), Adaljiza Mango, hatete, sidadaun timor oan ne’ebé maka rejistu iha Atambua hamutuk na’in 36 ne’ebé hela iha konsulado atu mai, maibé sira la mai tanba konsekuensia fonteira taka.
“Ita hotu hakarak sira fila, mas ita kumpri desijaun ne’ebé ita halo ona, no ita konkorda katak ita taka lai, purtantu baseia ba dekretu lei fó kompetensia ba Ministéiru Interior (MI) para halo despaisu ida taka lai Fronteira, no ita taka hela ate 14 dias,” hateten nia.
Jornalista : Pedro de Almeida
Editora : Nelya Barros
