Lafaek News—Vise Ministériu Interior (V-MI), kinta 17/06/2021), Antonio Armindo, hala’o sorumutu ho Primeiru Ministru, Taur Matan Ruak, hodi aprezenta planu International Organization for Migration (IOM) kona-ba sistema integradu ba servisu imigrasaun iha Timor-Leste.
Vise Ministru Interior António Armindo hateten, durante ne’e ministeriu Interior servisu hamutuk ho International Organization For Migration hodi haree sistema ida ne’ebé integradu no di’ak liu ba servisu imigrasaun iha Timor-Leste no hetan apoiu finanseiru husi governu Austrália millaun 1.5.
“Tan ne’e iha ona kontaktu ho ita nia doadores sira ne’ebé atu ajuda ita, no ohin mai aprezente sistema ne’e ba ita nia sua exselensia primeiru ministru no nia kontente tebes hakarak haree sistema ne’e tenke lao ba oin no tenke kompleta iha futuru para ita bele uza,” dehan Antonio Armindo ba Jornalista sira hafoin remata sorumutu ho PM iha Palasiu Governu Dili, kinta (17/06/21).
Governante ne’e akresenta, sistema ne’ebé aprezenta mak sistema ida naran MAIDES, sistema ne’e IOM nian ne’ebé estabelese mós iha nasaun 25, ne’e duni da-daun ne’e estabelese mós iha Timor-Leste no servisu hamutuk ho sira hodi hadia servisu imigrasaun.
“Ne’e duni primeiru ita mai aprezenta ba sua exeselensia Primeiru Ministru hanesan mós Ministru Interior hodi hetan aprestasaun, depois kuarta oin ba hato’o iha konsellu ministru, tanba ita hatene katak ita nia doadores IOM sira mak ajuda ita entaun oinsa mak ita bele hahú iha faze primeiru ne’e” informa Governante ne’e.
Entretantu sistema ne’e hetan fundus husi governu Austrália totál millaun 1.5, nune’e primeira faze hahú durasaun tinan ida ho balun ni sei hahú iha fulan Setembru ka Agustu tinan ne’e.
Jornalista : Juvita dos Santos
Editór : Agapito de Deus
