Lafaek News—Sekretáriu Estadu Komunikasaun Sosiál (SEKOMS), kinta (17/06 /2021), lansa kompetisaun Youtube ba juventude sira iha Timor-Leste hodi esplora kreatividades iha produsaun video hanesan promosaun no publisidade liu husi plataforma online.
“Hanesan ita hotu hatene katak ita gosta la gosta, ita prontu ka la prontu agora ne’e, ita kompete ho teknolojia tanba ohin ita iha teknolojia foun ida no aban bainrua mosu tan teknolojia foun ida, entaun oinsá mak ita atu adapta ho teknolójia ne’e dezenvolve kada fulan no kada tinan,” dehan Eugenia Ribeiro, ba jornalista sira iha auditórium PCM Palasiu Governu, kinta semana ne’e.
Asesoria ne’e akresenta, produsaun video ne’e sei foku ba promosaun área hanesan Kombate hoax, promove internet saudável, kampañia vasinasaun, turizmu, arte no kultura, produsaun video ne’e ho durasaun minimu minutu 2 no másimu minutu 5.
Entretantu submisaun ba produsaun hahú simu iha loron 27 fulan juñu to’o loron 9 Jullu 2021, produsaun sira bele manda liu husi email ofisiál SEKOMS mediagabinetesecoms@gmail.com ho formatu link google drive , no rezultadu kompetisaun sei anunsia iha loron 18 fulan jullu 2021 no serimonia entrega premiu ba manan nain sira iha loron 20 jullu 2021. Prémiu ba manan nain sira sei fahe tuir kategoria sira hanesan, klasifiksasaun I hetan fundu ho valór $1000, klasifikasaun ll $750, klasifikasaun lll $500, klasifikasaun lV $400, klasifikasaun V $350.
Jornalista : Juvita dos Santos
Editór : Agapito de Deus
