LAFAEK NEWS– Vítima inundasaun Agustinho Taek-elo (atoni oan) kontinua halerik ba bee moos hafoin transfere hosi posku evakuasaun Masin-Lidun ba uma anterior bairru Lagoa Tasi-Tolu aldeia 12 Outubro suku komoro postu administrativu Dom Aleixo munisípiu Dili.
“Ha’u senti triste tebes tanba depois fila hosi fatin evakuasaun mai uma bee laiha, ho obrigatoriu ami tenki sosa loron-loron, se lae ami ba kuru iha Rai-kotu hafoin bele konsume,’’ deklara Agustinho Taek-elo (atoni oan) ba lafaek news foin lalais ne’e
Atoni oan ho oin triste dehan maske lao ba kuru bee ho distánsia ne’ebé do’ok maibé pasensia tenke ba kuru tanba ne’e nesesidade.
“Dalaruma ami ba kuru be’e moos iha fatin ne’ebé dook maibé pasiensia tatoli masa mamuk hosi ema ba kuru, selae sosa rasik husi kareta nebe’e maka fa’an be’e maibe ho situasaun pandemia covid-19 halo ami osan laiha atu sosa,” tenik nia
Difikuldade be’e moos ne’e halo Atoi oan ho komunidade balun peokupadu tebes tanba atu halo aktividade dapur nian hanesan tein mós difisíl.
“Ami agora be’e mós laiha liu atu konsumo ka presija ba loron loron nian hanesan atu tein de’it mós araska no agora osan laiha atu sosa be’e moos,”konfesa nia
Difikuldade laos de’it bee moos maibé inklui uma ne’ebé sira hela ba nakonu ho tahu ho nune’e labele garante sira nia saúde di’ak, liuliu labarik ki’ikoan sira.
“Ami kontinua sofre tanba alende bee moos laiha, ami nia uma mós nakonu ho tahu dois ne’ebé sei prejudika ami nia saúde,” dehan nia
Ikus Agustinho propoen ba parte kompetente atu solusiona lalais preokupasaun bee moos ne’e tanba tempu agora bai-loron naruk sei difikulta tebes ba sira hetan be’e moos.
“Ami husu ba governo atu bele ajuda ami hanesan be’e mós ho hahan tamba agora kareta la halai ami atu ba servisu oinsa no hetan osan hosi nebe’e,” sujere nia
Jornalista : Manuel Andrade
Assitente Editór : Felisberto Fernandes :
