Lafaek News–Komandante Polísia Tránzitu (PolTranz), Insp. Polísia Domingos Gama, husu ba ema ne’ebé la’o ain iha zebra cross leten tenke la’o ho didi’ak atu minimiza asidente.
Domingos Gama hatoo asuntu ne’e hafoin hala’o sensibilizaun iha rotounda Komoro, tersa (29/03/22), hamutuk ho jornalistas nasional sira kompostu husi radio, televizaun, online ho jornal.
Husu ema la’o ain sira tenke hatene bainhira mak sira bele ultrapasa iha Zebra Cross no oinsá mak bele ultrapasa iha Zebra Cross ho didiak no lolos, liu liu iha rotunda sira, ita atu hatete númeru asidente iha tinan kotuk ema nain 23 lakon vida, entaun liu husi sensibilizasaun ida nee ita bele hamenus numeru asidente neebe iha tiha ona, karik tinan oin numeru asidente nee sae entaun presiza kuntinuidade tanba ida nee ami nafatin kovida ita boot sira husi media,” Inspetor Polisia Domingos Gama
Komandante Tránzitu munisípiu Dili, Insp. Polísia, Domingos Gama afirma, servisu jornalista importante hodi fahe informasaun ba sidadaun sira iha teritoriu tomak ne’ebé la’o ain no mós ba motorista sira ne’ebé uza transporte iha estrada públiku.
Imi (Jornalista), nia prezensa ho ami, lori susesu servisu tránzitu no rodaviáriu nian ba ita nia nasaun no estadu, ami mesak servisu sei la susesu kuadu la iha imi nia prezensa,” dehan Komandante Tránzitu ne’e.
Inspetór polísia ne’e dehan atividade sensibilizasaun realiza husi Polísia Tránzitu (PolTránz) munisipiu Dili hamutuk ho Jornalista Rádiu, televizaun Jornal no mos media Online sira hodi fahe informasaun ba públiku, tanba dala barak motorista sira ne’ebé lori kareta ho motor sempre viola regra no sináis ne’ebé estabelese ona iha estrada públiku.
Ita nia misaun mak informa ba ita nia sidadauk sira ne’ebé seidauk komprende konaba sináis tránzitu maibé liu husi ita nia atividade sensibilizasaun ida ne’e bele kompriende no halo tuir,” Inspetor Domingos esplika.
Jornalista :Orlando Magno
Editor : Agapito de Deus
