Lafaek News–Prezidente Tribunal Rekursu (PTR), Deolindo dos Santos Pronunsia kandidatus nain rua José Ramos Horta, ho Francisco Guterres Lú Olo hakat ba segundu volta eleisaun prezidensial 2022, ho razaun kandidatu mais votadu la atinje votus 50+1% tuir lei haruka.
Prezidente Tribunal Rekursu, Deolindo dos Santos informa, husi rezultadu ne’ebé iha entre kandidatus hamutuk 16 ne’e, laiha kandidatu ida mak hetan votus validus ou 50 + 1%, tanba ne’e mak laiha kandidatu ida mak eleitu iha primeira volta.
Tuir konstituisaun artigo 76° numeru 3-4 no mos artigu 11 lei 7/2006 28 dezembru iha numeru 2-3 katak, kanidatu nain rua, José Ramos Horta ho Kandidatu Francisco Guterres Lu-olo ne’ebé mais votadu maka sei kontinua iha segundu volta tanba nee Aban ita halo sorteiu ba kandidatu rua atu hetan atribuisaun boletim de votu,” dehan Prezidente TR Deolindo iha TR kaikoli Dili. Tersa 29/03/2022
.Prezidente TR Deolindo esplika, juis Koletivu husi TR hamutuk nain tolu kompostu husi juis Deolindo dos santos, Jacinta Correia da Costa no mos Juis Duarte Tilman Soares, verifika votus rezultadu provizoriu ne’ebé mai husi Comissão Nacional de Eleições (CNE), kona-ba akta apuramentu nasional, munisipal inklui Raeoa, nune’e eleisaun ne’ebe hala’o iha 19 Marsu 2022 koletivu ne’e halo análiza tomak ho prosesu sira ne’e hotu la hetan irregularidade ne’ebé bele afeta ba rezultadu eleisaun liu ona.
Koletivu mos verifika ba apuramentu ne’ebé CNE halo komesa husi sentru votasaun mai apuramentu munisipiu too apuramentu nasional katak prosesu nee la’o tuir forma neebe loos,” nia rekoñese
Iha artigu 48° lei 7/2006 koletivu nee delivera katak primeira votasaun ba eleisaun prezidensial ne’ebé foin lalais iha loron 19/03/2022 nee validu no nia rezultadu definitivu neebe proklama hanesan eleitor sira lartisipa no mos votus validu kada kandidatura, tuir lei rezultadu ida nee sei komunika ba CNE ho STAE no mós sei publika iha jornal republika
Tuir dados husi Rezultado ne’ebé Lafaek News asesu iha Tribunal Rekursu, Kandidatu Isabel da Costa Ferreira Hetan votus 4.219 (0.6%), Hermes da Costa Correia Barros 8.030 (1.2%), Maria Ângela Freitas da Silva 711 (0.1%), Rogeiro Tiago de Fátima Lobato 2.058 (0.3%), Anacleto Bento Ferreira 13.204 (2.0%), Francisco Guterres Lú Olo 144.282 (22.1%), Maria Helena de Jesus Pires 5430 (0.8%), Tito da Costa Cristóvão 49.314 (8.6%), Armanda Berta dos Santos 56.690 (8.7%), Anteiro Bendito da Silva 1.562 (0.2%), Constâncio da Conceição Pinto 2.520 (0.4%), Virgílio da Silva Guterres 1.720 (0.3%), Martinho Germano da Silva Gusmão 8.598 (1.3%), José Ramos Horta 303.477 (46.6%), Felisberto Araújo Duarte 2.709 (0.4%), no mos Mariano Assanami Sabino hetan votus hamutuk 47.334 no (7.3%).
Dadus rezultadu eleisaun prezidensial, eleitores Inscritos hamutuk 859.631, Eleitores votantes 664.106, Taxa partisipasaun 77.26%, Votos validos 651.859 (98,16%), Votos branco 3.743 (0.56%), votus nulos 8.386 (1.26%), Votos Rezeitados 65 (0.01%).
Jornalista : Orlando Magno
Editor : Agapito de Deus
