Lafaek News— Komandante Jerál Polísia Nasionál Timor-Lete (PNTL), Komisáriu Faustino da Costa, informa populasaun hotu tenke akompaña informasaun governu halo ona estensaun serka sanitária ba kapitál Dili ba semana rua tan, ne’ebé signifika la’os loron 02 Abril loke dalan, maibé dia 02 ne’e kontinuasaun tan loron 14.

“Ita hotu tenke akompaña katak governu halo ona estensaun ida ne’e liu-liu ba kapitál Dili ba semana rua tan, ne’ebé signifika la’os dia 02 ne’e hotu, más dia 02 ne’e kontinua tan loron 14,” informa Komisáriu Faustino da Costa  ba Lafaek News iha Tasi-tolu Dili,  sesta, (02/04/21).

Ho ida ne’e, komisáriu ne’e dehan entendimentu populasaun sira la loos, ba da-daun ne’e implika iha postu fronteira hotu iha munisipiu Dili nian ema nakonu no tenta atu ba munisípiu.

“Ita nia komunidade ita nia populasaun hotu tenta atu sai ba munisipiu seluk tanba sira hanoin katak tama dia 02/04 ne’e hotu ona, nune’e ha’u nia prezensa iha ne’e,” katak KOMJER PNTL ne’e.

Tanba ne’e hato’o membru PNTL sira atu esplika ba komunidade sira ho meius oinsá para sira bele fila, tanba haree populasaun barak hobur iha baliza Dili nian liga munisípiu hotu no kontra total regra distánsia fíziku.

“Dala wain komunidade barak intende katak serka sanitária iha Dili ne’e remata iha dia 02/04, maibé dia 02 ne’e kalan boot iha oras 11:59, hela minutu ida tama ona ba dia 03/04,” nia argumenta.

 Komisáriu ne’e informa, kuandu sira la fila entaun bele mosu moras ne’e atu hadaet, tanba ema hotu ne’ebé da-daun ne’e halibur malu iha ne’e, ida la hatene ida seluk katak nia moras ka la’e, neduni atu evita membru PNTL iha obrigasaun orienta sira haruka sira ida idak fila ba nia fatin.

 Maibé ema sira ne’ebé iha karta autorizasaun husi sala situasaun SIJK ka parte relevante sira ne’ebé iha autorizasaun atu halo deslokasaun maka sei nafatin la’o hanesan baibain,se laiha autorizasaun husi sala situasaun ne’e ida’idak tenke fila ba ninia fatin.

Jornalista     : Juvita dos Santos

Editora          : Nelya Barros