LafaekNews-Komandante Jerál Polisía Nasionál Timor-Leste(PNTL) Komisáriu Faustino da Costa, informa, PNTL prontu asegura situasaun durante períodu kampania no eleisaun prezidensiál ba periodu 2022-2027 nian, maske ho rekursu ne’ebé menus maibé sei jere membru PNTL sira hodi garante estabilidade nasionál.
“Preparasaun komandu Polisía Nasionál Timor-Leste(PNTL) nian, ba eleisaun prezidensiál no kampania nian, Polisía prontu maske ami nia rekursu ne’ebé menus, maibé presiza hare iha situasun ida ne’ebé mak ami hare hodi jere membru sira,” dehan Komandante Jerál Polisía Nasionál Timor-Leste (PNTL) komisáriu Faustino da Costa, hato’o asuntu ne’e hafoin hasoru malu ho Presidente Repúblika Fransisco Guterres Lú-Olo, iha palasíu Preidensiál, Bairo-Pite, Dili, kinta-feira, 20/01/2022.
KomJer PNTL ne’e afirma, PNTL iha 2022 ne’e Orsamentu ne’ebe boot, tanba ne’e PNTL sei sosa viaturas no aluga atu bele uza iha tempu kampania no eleisaun prezidensiál nian.
“Iha fatin votasun balun ami identika ona balun laiha liña komunikasaun, difikulta asesu tranporte hare hela kordena ho parte relevante atu haree situasaun hirak ne’e,nune’e situasun hotu La’o di’ak durante períodu kampania no eleisaun prezidensiál”,dehan Komjér.
Iha sorumutu ne’e ’e Komandante Jerál Polisia Nasionál Timor-Leste, Komissario Faustino da Costa, ho Presidente Repúblika Fransisco Guterres Lú_Olo ko’alia mos kona ba ba atividade hirak ne’ebé mak PNTL halo durante períodu 2021 no mos kona ba preparasaun ba kampania elisaun Presidensial.
Enkuantu data eleisaun prezidensiál ba periodu 2022-2027 sei akontese iha loron 19 fulan marsu 2022, maibé data kampania sei hahú iha loron 2 fulan marsu to’o loron 15 fulan marsu.
Jornalista: Rita Moniz
Editor: Egidio Nono
