Lafaek News-Durante periodu 2021 númeru kazu asidente tráfegu hamate ema hamutuk lima nolu resin sia (59), tanba sidadaun la iha konsiensia uainhira lori viatura kareta no motor, no la kontrola kondisaun
Asuntu ne’e hato’o husi Komandante Jerál Polisía Nasionál Timor-Leste (PNTL), Komissáriu, Faustino da Costa, ba jornalista sira iha Palasíu Prezidensiál bairo-pite hafoin hasoru malu ho Xefi estadu Francisco Guterres Lú_olo kinta 20/01/2022.
Nia informa, tuir dadus durante períodu 2021 akontese asidente tráfegu tránzitu ninian, kuaze sidadaun na’in 59 mak lakon vida, tanba ho asidente hirak akontese deteta katak, kauza dala barak sidadauun sira mak laiha konsiensia humana uainhira utiliza viatura hanesan kareta ho motor.
“Akontesimentu ho numeru ne’e sai preokupasaun, iha fulan janeiru de’it mos barak tia ona, sidadaun barak la tau atensaun ba kondisaun viatura sira hodi sidadaun barak lakon Vida detekta ema mak laiha konsiensia bainhira lori kareta ho motor la tau atensaun ba kondisaun viatura sira,” Komandante Jéral Polisia Nasionál Timor-Leste (PNTL) Komissario Faustino da Costa.
Iha sorin seluk lider maximu PNTL, ne’e mós relata, ohin sorumutu ho prezidente da Repúblika hodi relata kona-ba ba atividade hirak ne’ebé mak PNTL halo durante períodu 2021, nomos kona-ba preparasaun ba kampañia eleisaun Presidensial, periodu 2022-2027, ne’ebé sei iha loron 2 fulan marsu no sei realiza akontese eleisaun Prezidensial iha loron 19 de marsu 2022.
Jornalista : Rita Moniz
Asisten Editór : Egidio Nono
