Lafaek News-Ho situasaun ne’e, família matebian deside tula mate isin ho karreta baskolante iha postu administrativu Venilale, Munisípiu Baukau tanba laiha kareta funeráriu hodi tula mate isin husi aldeia Umanauku, Suku Badaho atu lori ba iha suku Baduho, aldeia Kaihakutula.
Família Tula matebian Iha Kaixaun laran. Foto copy iha facebook.
“Ami tula iha kareta baskolante tanba ami buka kareta funeráriu iha munisípiu Baukau ne’e laiha, kareta iha tolu de’it entaun ami ba husu sira dehan kareta sai hotu, entaun kompañia ho naran Cuba UNIP. Lda iha Kailara, tanba nia bai-bain iha Baukau, kuandu ita sosa kaixaun iha ne’eba entaun nia responsavel kedas ho kareta funeráriu nian, mais komu kareta funeráriu sai hotu, liga ho estadu emerjeésia entaun ami familia foti desizaun halo konkordánsia ho kompañia refere tula duni iha baskolante ne’e,” informa Maun rasik husi matebian, Olivio Alves Guterres, ba lafaeknews.com, liuhusi via telefone, Tersa (30/03/2021).
Nia informa, sira la konsege kontaktu ba Ministériu Solidaridade Sosiál no Inkluzaun (MSSI), maibe sira husu iha kompañia ne’ebé durante ne’e, atende tula mate isin iha Baukau nian, maibé ambulansia ne’ebé agora dadauk iha munisípiu Baukau nian iha tolu, rua sei funsiona ida mak avaria.
Beatriz Alda do Rego Matebian
Matebian ho naran Beatriz Alda do Rego, ho idade 31, durante nia moras hela de’it iha nia tiu sira nia uma, iha aldeia Umanauku, Suku Badaho, to’o hakotu is entaun família sira atu lori nia ba uma iha suku Baduho, Kaihakutula, postu adminitrativu Venilale, maib kareta funeráriu laiha entaun família sira deside konkordánsia ida ho kompañia Cuba UNIP. Lda. tula ho truk de’it.
Iha sorin seluk, João Fendandes Sarmento, hanesan mós família husi matebian, hatete, dader famélia sira ba hola kaixaun husu kedas ho ambulánsia, maibé ambulánsia laiha entaun sira deside tula de’it ona mate isin iha truk.
“Hanesan família husi matebian hatete horiseik dader família sira ba hola kaixaun husu kedas ho ambulánsia, maibé ambulansia la iha entaun sira deside tula de’it ona mate isin iha truk ne’e,” informa João
Nia parte, husu ba governu atu haree ba kestaun ne’e, atu nune’e ba futuru ita prevene para labele akontese tan, situasaun sira hanesan ne’e liuliu presiza ambulansia iha munisípiu sira.
Antes notísia ne’e públika Iha mídia online lafaeknews.com, seidauk halo konfirmasaun ho Ministériu Solidaridade Sosiál no Inkluzasaun, maibé kontinua esforsu hosi halo konfirmasaun atu nune’e resposta ba kestaun hirak ne’e, nune’e ba oin labele akontese tan.
Jornalista : Egidio Nono
Editór : Floriano Soares
