Lafaek News—Ministériu Edukasaun Juventude Desportu (MEJD), hamutuk ho UNICEF, kuarta (31/03/2021), ofisialmente lansamentu programa eskola ba uma ba estudante sikulu 3 no Ensinu sekundáriu no planeia apoiu internet ba estudante sira.
Ministru Edukasaun Juventude Desportu (MEJD), Armindo Maia, esklarese kona-ba apoiu internet ne’e la’os ba munisipiu hotu, maibé ba munisipiu ne’ebé da-daun ne’e sei afetadu hela covid-19.
“Orsamentu ne’ebé prevee atu apoiu internet ba estudante sira kuaze $ 3 milloens, maibé ita hein desizaun husi membru parlamentu sira aprova orsamentu ne’e ka lae?,” dehan MEJD Armindo Ba jornalista Hafoin halo lansamentu Programa ba uma iha salaun Enkontru MEJD Vila-verde Dili, Kuarta 31/03/2021.
Hodi dehan, orsamentu ne’ebé prepara atu fo apoiu internet ba estudante sira ne’e, maibé depende membru Parlamentu Nasionál mmaka iha kompeténsia atu aprova osan ba Item refere.
“Ita prevee ona orsamentu jerál estadu foin lalais ita iha osan ratifikativu maibé agora oinsá atu apoiu internet ba estudante sira, maibé kona-ba televizaun infelizmente ami labele ajuda kada estudante sira,” ministru edukasaun ne’e argumenta.
Estudante ensinu báziku, ensinu sekundáriu no tékniku vokasionál sei tuir programa eskola ba uma liu husi televizaun eskola ba uma ka tele-eskola, Youtube eskola ba uma inklui facebook eskola ba uma inklui aplikasaun eskola ba uma.
“Bainhira estudante sira dúvidas bele hato’o perguntas liu husi hotline tanba profesores sira iha atu responde estudante sira nia perguntas,” nia esplika.
Kona-ba estudante sira iha munisípiu ne’ebé la afetadu sei ezame hanesan baibain, maibé estudante ne’ebé sei afeta hela sitauasaun serka sanitária iha munisipiu tolu hanesan Dili, Baukau no Vikeke sira ne’e, MEJD sei adopta informativu.
Entretantu Ministeru Edukasaun Juventude Desportu hatoo ninia agradese-wa’in ba parseiru UNICEF, Vice ministru MEJD no voluntáriu sira ne’ebé esforsu aan iha situasaun estadu emerjénsia hodi prepara ona livru ba estudante sira iha programa eskola ba uma.
Jornalista : Orlando Magno
Editora : Nelya Barros
