Lafaek News—Populasaun Suku Funar postu administrativu Laklubar, munisípiu Manatutu utiliza kuda hodi transporta material konstrusaun no nesesidade loro-loron husi vila ba suku tanba kondisaun estrada la di’ak.
Relasiona ho dezastre natureza iha loron 4 fulan Abril liuba, rezulta rai monu sobu estrada diresaun Laklubar liga suku funar, iha ne’ebé, too agora governu seidauk normaliza hodi tulun populasaun kiik sira movimentu husi suku ba postu Laklubar.

Liga ho preukupasaun ne’e, Xefe Suku Funar, Olinda Pereira informa, estrada diresaun Laklubar ba suku Funar kilo-metru 8, transporte públiku labele asesu halo movimentasaun durante tinan ida ona tanba tinan kotuk akontese inundasaun 4 de abril tinan 2021 provoka rai monu halo estrada sai tiha hanesan mota.
“Agora da-daun ne’e ami infrenta hela problema estrada, tanba akontesimentu iha dia 4 de abril tinan 2020 liu ba, estrada Laklubar to sentral Funar nian estraga total kilo-metru 8,” informa autoridade komunitáriu ne’e ba lafaek news iha suku Funar postu administrative Laklubar, foin lalais ne’e.
Xefe suku ne’e relata, momentu iha eleisaun prezidénsial nia laran konsege hetan normalizasaun husi kompaña Hatu-Wari, depois paradu too agora,
“Maibe iha fulan 7 ou 8 ida hnsa ne’e momentu iha elisaun prezidensial nia laran konsege hetan hadia husi kompaina HATU-WARI tamba durante ne’e nia mak toma konta ba estrada ne’e,i momentu akontesimentu entaun paradu tia utuan idepois mak hetan fali orientasau balun kontinua fila-fali iha fulan 7-8 nia laran agora ami asesu hela,” katak Olinda Pereira.
Maibé, nia dehan, normalizasaun ne’e la duru, tanba agora mosu fila-fali kondisaun udan ne’ebé lor-loron fo fali risku ba komunidade sira atu asesu.
“Tanba situasaun no kondisaun ho udan ne’ebé mai lorloron entaun difikulta estrada boot husi postu ninian mai iha suku Funar,” hateten Olinda Pereira.
Xefe suku ne’e haktuir ba da-daun ne’e susar tebes ba komunidade sira atu lori produtu lokal ba faan iha postu Laklubar, obrigatóriu komunidade sira la’o ain tutur sasan tula ho kuda atu lori sira nia produtu ba postu.
Iha parte seluk, xefe aldeia Bamatak, Abilio de Araujo hateten, tuir nia observasaun no asesu ba estrada refere fo risku tebes ba sira atu halo movimentasaun, estrada ne’e uluk halo iha tempu okupasaun Indonézia no inundasaun estragus tan iha 4 de Abril tinan kotuk estraga total no fo risku tebes ba sira atu asesu.
“Hau nia observasaun durante ha’u asesu ba estrada diresaun Laklubar mai funar risku boot, tanba estrada ne’e uluk Indonézia nia ukun ami kee iha 1991 hotu iha 1992 ami uza too agora, maibé foin dadauk mak afeta fali inundasaun iha 4 de abril tinan 2021 liu ba estraga total i risku boot ba ami suku funar se ami uza bebeik ami hanoin ladura,” hateten autoridade lokál aldeia Bamatak ne’e.
Hodi dehan, ba da-daun kareta labele tama no ema ne’ebe mak uza motor mos tenke rins mamar, tanba se la’e labele, dalan risku tebes.
Observasaun lafaek news iha terenu nota katak estrada diresaun Laklubar ba iha suku Funar susar tebes ba komunidade sira atu asesu, kauza husi udan rezulta rai monu, no bee kadalak sira suli tuir estrada klaran infeita hanesan mota kuak hodi hasura komunidade sira movimenta ba mai no total uma kain iha suku Funar hamutuk 436.
Jornalista : Alsino da Costa Madeira
Editór : Agapito de Deus