Lafaek News—Estrada husi Glenu munisípiu Ermera liga postu administrativu Letefoho ho Atsabe, udan provoka tahu dodok hasusar transporte públiku iha loron viajen loro-loron.
Motorista Lino Martins ba lafaek news iha Segunda feira semana ne’e informa, estrada husi ponte Manuten sa’e ba Nunutali no husi Nunutali ba kruzamentu Hummboe dalan kuak barak ho tahu dodok hasusar kareta tula pasajeirus husi Glenu ba Hatulia, Letefoho ho Atsabe.
Nune’e nia dehan, estrada husi Humboe, Eraulo, Goulolo too ponte Bermeta-Hatoe, too Ainai estrada at loos, tahu nakonu, susar liu ba kareta ho motorizadas sira ne’ebé husi Glenu ba postu rua refere.
“Estrada Letefoho ho Atsabe ne’e at ba bebeik, at liu iha tempu udan hanesan ne’e, susar tebes ba kareta ho motor, tahu mk naku iha estrada laran,” haktuir motorista Lino Martins ba Lafaek News, foin lalais ne’e.
Motorista ne’e fo hanoin, se bele governu liu husi Ministériu Obras Publikas tenke tuun direta hodi observa, bainhira halo konstrusaum ba estrada tenke halo estudu klean atu nune’e iha tempu udan hanesan ne’e labele difikulta fali movimentasaun transporte públiku.
“Fo hanoin ba governu liu husi MOP atu mai haree estrada Ermera liu-liu ba postu Letefoho ba Atsabe, kada tinan aumenta at nafatin, presiza fo projetu ba kompania ne’ebe iha kapasidade hodi halo konstrusaun ba estrada postu rua ne’e,” Lino rekomenda.
Iha sorin, negosiante postu Letefoho Martino Soares, reforsa nia parte sebte triste tebes, governu gasta osan kada tinan ho montante boot, maibé rezultadu estrada munisípiu Ermera kada tinan at ba nafatin.
“Governu gasta osan povu nian kada tinan ho montante boot, más estrada Ermera tinan-tinan at hela de’it, ami husu governu foun ida ne’e atu tau matan ba estrada Ermera liu-liu Letefoho ho Atsabe nian,” Martino akresenta.
Observasaun lafaek news iha terenu nota, estrada diresaun Kailiti Letefoho kondisaun at liu no provoka tahu dodok ne’ebé nakonu ho rai-mean, hasusar tebes motorizadas ho kareta publiku ne’ebé tula pasajeirus ba mai Gleno, Letefoho ho Atsabe.
Ekipa Lafaek News
Editor : Agapito de Deus
