Lafaek News—Relasiona ho akontesimentu iha loron kuarta (06/05/2026), Xefe suku Lodudo ho inisial E. de J.S. informa kazu ne’e akontese tanba komunidade minoria la simu ho desizaun xefe suku la aseita harii sede suku iha fatin ne’ebé laiha espasu.
Xefe Suku ne’e hatoo ba Lafaek News kona-ba kronolójia hosi akontesimentu ne’e, iha loron kuarta (05/2026) tuku ida liu, problema ne’e hadau malu fatin harii sede suku, Xefe suku foti desizaun tuir ema maioria nia hakarak, maibé grupu kiik balun husi aldeia Gueguemara la satisfas ho xefe suku nia desizaun mak hamosu problema no grupu kiik husi aldeia Gueguemara halo asaun hodi baku xefe suku.
“Problema refere hadau malu fatin harii sede suku, Xefe suku foti desizaun tuir ema maioria nia hakarak, maibé grupu kiik-oan balun husi aldeia Gueguemara la aseita ho xefe suku nia desizaun mak hamosu problema no grupu kiik ne’e hosi Gueguemara ne’e halo asaun hodi baku xefe suku,” Xefe Suku Lodudo ho inisial E. d. J.S. ba Lafaek News liu hosi telefone iha loron 6/05/2026.
Kazu ne’e akontese, bainhira xefe suku halo hela reuniaun ho nia komunidade sira iha sede provizóriu suku Poetete Lodudo, nune’e iha reuniaun ne’e maioria komunidade la aseita ho grupu kiik ida nia hakarak atu harii sede suku iha aldeia Gueguemara, inklui xefe suku rasik ho komunidade barak mak la aseita ho razaun fatin ne’ebé grupu kiik ne’e ninia hakarak atu harii sede suku ne’e espasu laiha, fatin kloot liu, motor kareta labele para wainhira iha reuniaun ou atividade suku nian.
Iha sorin seluk, komunidade Lodudo ho inisial JS haktuir ba Lafaek News katak, Problema ne’e, tanba osan hosi PNDS, osan ne’e aloka atu halo Estrada, maibé xefe aldeia Gueguemara ho nia komunidade hakarak osan ne’e tenke halo sede suku iha sira nia aldeia laran.
“Ha’u mos ladun kompriende, ema aloka ba halo estrada nee, maibe ho xefe aldeia Gueguemara ho nia populasaun hakarak osan ne’e tenke halo sede suku, ho nune’e, fatin ne’ebé sira deside ona iha momentu ne’eba atu harii iha aldeia Gueguemara nia bairo, maibé espasu atu para de’it motor mos laiha, fatin kloot liu, tan ne’e orsamentu refere xefe suku aloka fali ba aldeia Urletoho atu halo estrada, ho ida ne’e mak xefe aldeia ho nia komunidade la simu, obriga xefe suku atu asina surat hodi halo sede suku ne’e, Momentu ne’eba xefe suku atual oferese hela rai uituan ba estadu atu halo sede suku ne’e gratuita, más xefe aldeia ho ema sira la simu, komunidade hakarak halo sede suku iha bairo-laran, problema fatin kloot atu para motor ho kareta susar tebes bainhira iha eventu ruma, hosi enkontru ne’e la simu malu mak komunidade lori kadeira baku xefe suku ne’e,” haktuir komunidade Lodudo ho inisial JS ba lafaek news liu hosi telefone iha loron kuarta (06/05/2026).
Nia haktuir, iha reuniaun ne’e protesta makas liu hosi komunidade aldeia Gueguemara hakarak sede tenke harii iha aldeia ne’e nia laran, ho nune’e komunidade la simu desizaun xefe suku nian too foti kadeira baku xefe suku no komunidade balun konsege baku malu iha resinu sede provizóriu nia oin, maibé akontesimentu ne’e autoridade seguransa PNTL too kedan iha fatin hodi hakalma situasaun no lori ema sira halo problema ne’e ba kedan polísia hodi submete ba investigasaun.
Kobertura : Ekipa Lafaek News
