Lafaek News—Autoridade Protesaun Sivil (APS-sigla Portigés) Segunda, 29/01/2024, iha ne’ebé Xefe Seksaun Relasaun Externa Nelson Nunes de Orleans, relata, hahú iha loron 23 to’o 29, fulan janeiru 2024 APS rejistu uma hamutuk 181 mak hetan estragus husi dezastre naturais.
Akontese iha munisipiu hanesan Aileu anin sobu uma 2, Ainaru anin sobu uma 6, Baukau anin sobu uma 10 no ahi han uma 2, Kovalima anin sobu uma 9 no ahi han ema 1, Lautem anin sobu uma 9, Liquisa anin sobu uma 31, Manatutu anin sobu uma 4 no ahi han uma 2, Manufahi anin sobu uma 3 no ahi han uma 1, Raeoa anin sobu uma 44 no Vikeke anin sobu uma 11 no ahi han uma 2.
“Husi dezastre naturais ne’ebé akontese iha teritóriu nasional iha tipu tolu hanesan, rai halai, ahi han uma no anin sobu uma, parte komandu Autoridade Protesaun Sivil munisipiu ho parseiru relevante fornese asisténsia emerjénsia hanesan aihan ba familia afetadu sira,” Nelson ba jornalista sira iha konferénsia imprensa, Segunda (29/01/2024).
Nia dehan, vítima sira ne’ebé ninia uma estragus total husi dezastre naturais ne’e rasik, parte ekipa protesaun sivil sei halo hela verifikasaun, atu haree ba uma sira ne’ebé mak hetan estragus Kaman, a’at total no a’at naton.
“Vítima sira ne’ebé hetan dezastre naturais, balu oras ne’e hela iha vizinu sira nia uma no balu iha komandu Autoridade Protesaun Sivil munisipiu sira nia liman, hodi apoiu emerjensia ba vítima sira, liuhusi ai-han sira hanesan (food item no non-food), ne’e hanesan apoiu emerjensia, maibé ba konstrusaun sira ne’e sei halo verifikasaun ba dadus hodi haree katak, vítima sira nia uma ne’e bai ha tipu saida”. Nelson Nunes de Orleans hakotu.
Jornalista : Crispin de J. Amaral
Editór : Agapito de Deus
