Lafaek News—Inan faluk Ana Maria, nia halerik ba hahán uma laran tinan naruk, moris depende liu ba viziñu sira mak oferese aihan bikan ida hodi hatutan moris, susar no terus inan faluk ne’e dada atensaun kompania Rosario Auto-Sales oferese ona nesesidade bázika foos no mina ba faluk Ana hodi kontinua hatutan moris.
https://www.lafaeknews.tl/dere-vizinu-nia-odamatan-tan-deit-hahan-bikan-ida/
Lito Rosario hanesan Emprezáriu Timor-oan ho naran kompania Rosario Auto Aales ne’ebe ho fuan boot hodi hakat too iha inan faluk Ana Maria nia hela fatin Kuluhun hafoin lee notísia husi media online ho titulu : Dere viziñu nia Odamatan Tan AIhan Bikan Ida, haree tiha notisia ne’e, Lito Rosario sentiment umanu mosu husi fuan buka tuir inan faluk ne’e nia uma iha Kuluhun hodi fo tulun nesesidade báziku hanesan foos, mina, masin, supermi hodi hatutan faluk Ana Maria nia nesesidade moris loro-loron.

Notisia ne’e, publika husi media lafaek news ne’ebé ho nia natureza redasaun kobre liu asuntu social tuir lema Lian Hosi Povu, rezultadu publikasaun durante Lafaek News publika, dada atensaun maka’as Timor-oan sira ne’ebé iha espíritu umanidade, hanesan da-daun kompania rosario Auto-Sales.
“Primeiru Ha’u Ha’u fo obrigado ba media online Laafaek News ne’ebe mai halo kobertura ba Ita Nia inan faluk Ana Maria, publika iha website media online Laafaek News,” katak Lito rosario.
Lito espresa, husi publikasaun ne’e fanu duni nia hanesan Emprezáriu foinsa’e, atu uitoan ka barak, tuir kapasidade tulun netik faluk Ana Maria ne’ebé moris hela iha susar no terus laran, hanesan Timor-oan la’os obrigatoriu, maibé tulun ne’e tenke mai husi fuan, katak fo ho paixaun, la’os fo ho intensaun.
“Bele ajuda inan feton sira ne’ebé presiza Ita nia tulun, Ha’u bele fo tuir ha’u nia forsa, ha’u sempre iha inisiativa ba no inisiativa ida ne’e la para, ba oin ha’u sei ajuda nafatin ba maluk kbi’it laek ne’ebé presiza hela ita nia tulun,” hateten Emprezáriu Rosario Auto Sales Lito Rosario.
Hafoin simu tiha oferta ne’e husi Lito Rosario, Inan faluk Ana Maria, hamonu mata-wen hodi husu agradesimentu ba emprezáriu Rosario Auto Sales ne’ebe apoiu ona nesesidade báziku ba inan faluk ne’e, no agradese mos ba media lafaek news ne’ebé halo kobertura direta ba inan faluk Ana Maria nia rezidénsia simples ne’ebé oferese husi Padre Domingos Maubere.

“Ha’u kontente tebes, tanba oan sira bele ajuda ona ha’u, Ha’u moz la haluha hato obrigado wain ba oan Lito Rosario husi Empresariu Rosario auto sales ne’ebé ajuda ona ha’u, maromak sei tulun Ita no maromak sei fo salvasaun, maromak sei haraik moris Naruk ba ita,” inan faluk Ana Maria haktuir.
Nune’e mos, Xefe aldeia Lao Rai suku Kuluhun, Alberto da Costa Xavier, hatoo agradese ba emprezáriu Rosario Auto Sales ne’ebe tulun ona Inan faluk Ana Maria ne’ebé durante moris iha susar laran.
“Ha’u agradese tebes ba empresariu Rosario Auto Sales ne’ebe ho fuan ho laran hodi ajuda ona ha’u nia komunidade inan faluk Ana Maria, Ha’u hanesan xefe aldeia, maibe ha’u mos kbi’it la too atu ajuda kbi’it laek sira, tanba ne’e ha’u agradese Empresa Auto Sales ne’ebe ajuda ona Ha’u Nia komunidade ne’e , kbi’it laek sira ne’e nia problema ha’u hato ona ba nai ulun sira, maibe ate a data laiha resposta
Iha Sorin seluk autoridade lokal ne’e mos rekomenda ba governu foun liu-liu ba Ministériu Solidariedade Sosial no Inkluzaun (MSSI) atu bele rezolve hela kbi’it laek sira Nia halerik ne’e iha tempu badak.
Jornalista : Mateus F. de Deus
Editor : Agapito de Deus