Lafaek News—Oé-cusse-05/04/2024, Comissão Executiva Zona Econômica Especiál Dezenvolvimento Oe-cusse Ambeno (CE-ZEEDOA) liu husi Grupu Serbisu Tekńiku (GST), hala’o aprezentasaun servisu hodi hato’o ba Coordenadór da Comissão Executivo no Presidente da Autoridade, RAEAO kona-ba prosesu no progresu halo elaborasaun ba Relatóriu Estadu Dezenvolvimentu Rejiaun Administrativa Espesiál Oe-cusse Ambeno (RAEOA) ne’ebé Grupu Serbisu Tékniku hala’o ona desde dia 5 Fulan Marsu 2024.
Enkontru ne’e hanesan enkontru regular Comissão Executiva ZEEDOA nian maibé hetan mós prezensa husi Presidente Autoridade RAEOA, Rogério Tiago de Fátima Lobato atu Akompaña ho besik-liu tan progresu serbisu ne’ebé Membrus Grupu Serbisu Tékniku halo to’o ohin loron.
“Agora dau-daun elaborasaun ba Relatóriu Estadu Dezenvolvimentu Rejiaun ne’e nia progresu atu to’o ona iha faze fińal. Iha fulan Jullu ami sei hahú kedas ho faze daruak, kona-ba preparasaun ba planu estratéjiku dezenvolvimentu Oé-cusse nian no orsamentu ba implementasaun planu ida ne’e, sei inklui mós elaborasaun ba enkuadramentu legál ba CE-ZEEDOA,” dehan Coordenadór CE-ZEEDOA, João Mendes Gonçalves.
Presidente Autoridade RAEOA, Rogério Tiago de Fátima Lobato dehan, nia parte agradese ba ekipa Grupu Serbisu Tekńiku (GST) ZEEDOA ne’ebé lidera husi Dr. João Mendes Gonçalves, ne’ebé hatudu serbisu ho progresu di’ak, nune’e bele aprezenta ba Konsellu Ministru.
“Ha’u rasik sei akompaña aprezentasaun ida-ne’e bainhira aprezenta ba Konsellu Ministrus, tanbá relatóriu ne’e relatóriu Rejiaun nian. Relatóriu Rejiaun ne’e sei fó hanoin ba saída Maka RAEOA atu halo no saída maka investimentu ZEEDOA ne’e. Ha’u agradese tanbá serbisu lalais, foin maka fulan rua de’it esbosu ba relatóriu ne’e besik atu kompleta ona, ne’e di’ak tebes, tanbá ne’e hatudu katak imi serbisu lalais dunik,” katak Presidente da Autoridade RAEOA, Rogério Tiago de Fátima Lobato.
Maske agora Autoridade RAEOA sei hasoru dezafiu oi-oin, maibé Presidente Autoridade RAEOA afirma katak sei kontinua fó apoiu saida de’it maka CE-ZEEDOA presiza hodi hala’o servisu.
Jornalista : Ekipa Lafaek
Editór : Agapito de Deus
