Lafaek News-Ekipa saúde Munisípiu Lautém liu husi servisu saúde hamutuk ho ekipa forsa rezerva Munisípiu Lautém nian evakua tan pasiente pozitivu na’in rua 2 iha iha bairo Raumoko, suku, Daudere, postu administrativu Lautém, munisípiu Lautém
Tuir xefe suku Daudere, Aderito Morais, hateten, kronolojia abitante pozitivu rua ne’e kompostu husi fen ho la’en tama Munisípiu iha Munisípiu Lautém iha dia 1 fulan Maio 2021, no abitante na’in rua ne’e ho karta lisensa maibé rezultadu swab, kuarta feira ne’e rona rezultadu teste swab ne’e deteta abitante na’in rua ne’e pozitivu Covid-19 no ekipa evakua ona mai iha sala izolamentu Lospalos Vila.
“Ha’u iha kordenasaun servisu di’ak ho líder munisípiu nian tanba durante ne’e ha’u nia sidadaun barak mak tama mai iha suku Daudere, maibé iha fallansu oitoan maka ita nia komunidade na’in rua ne’e rezultadu teste iha Baucau seidauk rona ita autoriza sira tama ona mai iha Munisípiu Lautém ne’e mak sai problema ba ita nia parte saúde ho parte seguransa sira iha baliza, tuir loloos ema tama mai ho rezultadu teste atu nune’e labele iha transmisaun komunitáriu iha suku ne’e,”dehan xefe suku Daudere, ohin iha, munisípiu Lautém, 05/05/2021.
Autoridade lokál ne’e hatutan, nia parte sei la autoriza kuandu sidadaun husi munisípiu seluk tama iha nia suku rasik labele halo kontaktu ba abitante sira iha suku laran, no nia parte sei apoiu hodi halo mitigasaun no prevensaun iha bairu Raumoko suku Daudere, no sei prontu kolabora nafatin kuandu husi parte saúde halo swab masal ka lokdown totál ba iha bairu Raumoko ba sidadaun hotu nia di’ak,”Aderito Morais.
Iha fatin hanesan, Diretur servisu saúde Munisípiu Lautém, Bernardo Amaral Lopes, Hateten, nia parte sei identifika pesoál saúde sira ne’ebé la obedese ba hirarkia hodi haruka abitante na’in 2 tama mai iha bairu Raumoko ba pesoál sira ne’e sei hetan prosesu disiplinar.
“Hanesan diretur saúde fo ona xamada atensaun ba pesoál saúde sira ne’e, ha’u husu sira mós toma responsabilidade, ba aktu sira ne’ebé sira halo, sira foti desizaun la tuir desizaun forsa rezerva nian sira duvida sira la husu, hanesan funsionariu públiku sansaun disiplinar sei la’o”dehan diretur saúde munisípiu saúde, iha Lautém, 05/5/2021.
Nia hatutan, iha evakuasaun ba abitante na’in rua ne’e administradór Munisípiu Lautém hamutuk ho komandante PNTL, Diretur saúde Lautém no médiku sira evakua kedas abitante na’in rua ne’e mai iha sala izolamentu Otél Aurelio, Lospalos Vila, tuir planu servisu saúde sei halo swab masal ba sidadaun sira iha bairu Raumoko.
Enkuantu pasiente pozitivu iha Munisípiu Lautém hamutuk 20 rua rekoperadu no kuarentena hamutuk atus ida resin mak autoridade Munisípiu ne’e kontinua kuarentena.
Jornalista :CE.Lautem
Asiten editór: Egidio Nono
