Lafaek News—Segundu komandante PNTL munisípiu Dili, Superintendente Polísia Euclides Belo, informa Komandu munisípiu Dili preparadu pesoal husi ekipa Task Force 50, destakadu iha area haat kompostu palasiu Nobre Lahane, Tasi-Toli Beduku ho Manleu hodi garante seguransa bainhira governu deside lockdown iha Dili
“Pesoal seguransa ne’ebé ami prepara hamutuk ema nain 50 atu koloka iha fatin 4, ne’ebé PNTL identifika hanesan, Hera, Tasi tolu, Beduku parte manleu, no mós iha palasiu Nobre Lahane, núne’e tranporte ne’ebé mai husi munisípiu la bele tama iha kapital Dili no husi Dili labele sai,” dehan Segundu komandante Munisípiu Dili ba jornalista iha KMD kaikoli Dili, segunda (08/03/2021).
Segundu Komandu PNTL munisipiu Dili ne’e , esplika ema sira ne’ebé iha asuntu emerjénsia hanesan, ajente seguransa, ajente médiku, no mós ajente emerjénsia seluk PNTL bele autoriza tama iha Dili, maibé ba sidadaun ne’ebé mai pasiar no halo atividade la nesesariu PNTL sei la autoriza.
“Komandu PNTL munisípiu Dili koloka membru sira iha fatin 4 ne’e, atu implementa regras COVID-19 núne’e ema hotu bele kumpri desizaun governu nian ne’ebé governu deside ona,” nia afirama.
Eucludes deklara, dadaun PNTL Iha tasi tolu fó apoiu ba segurnsa bairo afetadu no postu seguransa ne’ebé sira koloka ne’e, atu garante seguransa ba prosesu lockdown ne’ebé sei termina, tanba ne’e PNTL prepara ona pesoal seguransa sira.
Segundu komandante ne’e mós husu ba sidadaun hotu atu kumpri no kolabora ho pesoal saúde sira tanba moras COVID-19 ne’e ema labele haree, tanne’e liu husi teste mak bele identifika moras ne’e.
Jornalista : Orlando Magno
Editora : Nelya Barros
