Lafaek News—Daniel Carvalho husi aldeia Fatusuka suku Dare postu administrativu Vera-Krúz, munisípiu Dili, loron-kalan han loos de’it talas boot ne’ebé namlaek no dodok hodi hakbiit forsa ba moris.
Mane faluk Daniel Carvalho, nia moris loron-kalan laran metin ba viziñu sira mak tau matan ho hahan bikan ida, dala-ruma tenke han talas namlaek ne’ebé nia rasik b akee iha toos laran hodi tunu no daan han iha oras hamlaha.
“Ha’u moris hanesan ne’e durante tinan naruk no too agora la hetan ajudus ruma husi governu,”Defisiénsia mental Daniel Carvalho ba lafaek news iha nia rezidénsia Fatusuka Dare foin lalais.
Uma ne’ebé mane faluk horik ba, kalen taka no didin komesa fohuk no kuak husi kakuluk-leten, didin sira mos fohuk ona, matan haketek de’it, tanba laiha forsa atu sosa neyik kalen tahan ida hodi troka kalen seluk ne’ebé dodok ona iha uma kauluk no didin sira ne’ebé tabele ona.
Bainhira rona mane faluk Daniel Carvalho ne’ebé sofre moras defisiénsia mental ko’alia ho lia-fuan krítika katak orsamentu povu nian ne’ebé ho naran OJE kada tinan nai-ulun sira temi dehan osan povu nian, maibé povu rona de’it naran OGE ba povu, maibé povu kontinua moris ho presaun ekonomia uma laran.
Maske nune’e, Daniel maske sofre hela moras mental, maibé nia hanoin sei iha oinsá bele hakat ba nia toos laran hodi kee talas no ai-farina isin ida rua hodi tunu han loron-kalan.
“Kada tinan ami povu sempre rona husi Radio no Televizaun kona-ba orsamentu ne’ebé governu aprova maibé ami povu balun nafatin moris iha kiak no mukit nian laran, tanba ne’e ha’u husu bá IX governu atu bele tau matan hela ba ha’u nia moris no ha’u nia uma ne’ebé mak agora ho kondisaun grave tebes,” Daniel akresenta.
Iha Sorin seluk xefe aldeia Fatusuka Aida de Araújo, haktuir nia parte rekoñese aman faluk Daniel Carvalho, nia moris susar tebes, no nia mos sofre defisiénsia mental, no moris iha situasaun mukit no susar.
“Katuas Daniel ha’u nia komunidade, nia susar tebes ba ai-han, nia uma ne’e mos at ona, nia naran tama ona iha lista ba uma kbiit laek, maibé seidauk hetan,” dehan xefe aldeia Fatusuka ne’e.
Autoridade lokál ne’e hatoo nia krítika katak, iha kampaña eleitoral, nai-ulun sira mai ko’alia midar hanesan buat hotu sira mak halo milagre, maibé realidade nai-ulun sira haluha tiha promesa ne’ebé mak hatoo ba povu iha kampaña, tanba ne’e husu IX governu konstitusional atu servisu maka’as hodi hasai povu husi kiak no mukit.
“Ha’u hanesan autoridade lokál husu atu governante sira atu tuun diretamente mai baze hodi haree katuas Daniel Carvalho nia kondisaun moris atu bele tau atensaun urzentemente ba kbiit laek ne’e,” xefe aldeia Fatusuka rekomenda.
Ikus liu autoridade lokál ne’e mos agradese ba média online lafaek news ne’ebé mak ho fuan boot hodi ba halo kobertura ba kbiit laek Daniel Carvalho nia kondisaun moris, nia parte iha esperansa katak liu husi nútisia ne’e bele loke maluk Timor-oan sira ne’ebé iha espíritu umanizmu bele tau matan ba faluk Daniel Carvalho.
Jornalista: Mateus F. de Deus
Editór : Agapito de Deus
