Lafaek News—Centru Nasional Chega (CNC) Tersa Feira 26/09/2023, transmite história ba manorin na’in sira ne’ebé mak mai husi munisípiu tolu (3), hanesan Oecusse, Kovalima no Liquisa, iha ne’ebé hodi hare’e kona-ba kualidade história no edukasaun ba paz iha Timor-Leste.
Tuir diretór ezekutivu CNC Hugo Fernandes hatete katak, liuhusi workshop ida ne’e sai hanesan rede manorin ne’ebé mak estabelese parseria entre Ministériu Edukasaun nomós Ajénsia UNESCO, KOICA ho CNC, iha ne’ebé workshop ida ne’e realiza ba dala tolu no ikus ba ida ne’e, tanba ne’e mak CNC konvida manorin sira husi munisipiu tolu, hanesan Oecusse, Kovalima no Liquisa.
“Objetivu prinsipal husi workshop ne’e mak sei ko’alia kona-ba rede manorin matéria história oinsá mak sira bele fahe esperiénsia ba malu no oinsá mak hanorin matéria istória, atu nune’e sira bele hetan koñesimentu foun husi fasilitador sira ne’ebé mak hetan matéria prátika foun balu husi pais seluk, atu nune’e hanorin fila fali ba manorin sira hodi iha lala’ok ne’ebé kriativu, tanba matéria história la’os matéria ne’ebé fasil, maibé todan, tanba ita tenke hato’o ninia konteudu ne’e ho lolós ba ita nia estuddante sira, ” Hugo dehan.
Nia hatutan, Aleinde ne’e mós manorin na’in sira mai iha ne’e, iha oportunidade ba hare’e fatin historiku sira ne’e, tanba fatin historiku sira ne’e sai hanesan maneira foun ida oinsá mak hanorin materia história, tanba hanorin matéria história ne’e la’os iha aula laran de’it, maibé bele estudante sira ba fatin historiku, atu nune’e rona sasin sira saida mak akontese iha tempu pasadu, nune’e estudante sira iha interese atu buka hatene.
“Eventu ida ne’e INFORDEPE ho CNC, elabora ona manual ida liuhusi UNESCO, KOICA no Ministériu Edukasaun hodi halo prosesu revizaun, atu nune’e ita hein katak to’o tinan ne’e nia rohan, manual ne’e kompletu, nune’e ho manual ida ne’e ita fiar katak manorin sira bele iha mata-dalan ida ba sira hodi kaer oinsá mak bainhira sira hanorin materia ida ne’e ba estudante sira,” Governante ne’e relata.
Iha sorin seluk Diretór Nasionál do Ensino Sekundariu Geral, Benjamin Gomes da Cruz Fernandes hatutan katak, hodi Ministériu Edukasaun nia fatin agradese ba manorin sira hotu ne’ebé mai husi munisipiu Kovalima, Oecusse no Liquisa, nomós ba Centru Nasionál Chega ne’ebé forma ona professor sira, liu-liu iha matéria historiku, tanba materia historiku sai hanesan matéria ne’ebé kualidade no edukasaun ba paz, tanba ne’e ba manorin sira Ministériu Edukasaun husu ita bo’ot sira atu hatutan história ne’ebé mak hakerek tia ona husi CNC no servisu hamutuk ho UNESCO, atu nune’e ita bo’ot sira bele hatutan historia ne’ebé mak hakerek ona.
“Hanesan ohin ita nia diretór CNC, hatete katak ita tenke transmite história tuir buat ne’ebé mak ita hakerek, atu nune’e jerasaun sira tuir mai, liu-liu ita nia oan sira ne’ebé mak futuru ba rai ida ne’e atu bele koñese didiak kona-ba historia, sé ita transmite historia mak ita halai liu ba kor no politika, mak ita nia historia nia kualidade mós sei la iha, tanba ne’e husi ministeriu edukasaun nafatin pronto kopera ho Centru Nasional Chega,” Benjamin hakotu.
Jornalista : Crispin de J. Amaral
Editor : Paulo Collo
