Lafaek News—Eis Primeiru Ministru VIII Governu Konstitusional, Taur Matan Ruak reafirma kontribuisaun Monseñor Martinho da Costa Lopes, Dom Jaime Garcia Goulart no Dom José Joaquim Ribeiro, hola parta iha lulta libertasaun nasional ohin loron rai Timor hamriik mesak hanesan nasaun seluk iha mundu.
Eis Prezidente Repúblika no eis Primeiru Ministru Taur Matan Ruak hatoo asuntu ne’e hafoin partisipa iha misa abertura Velóriu Nasionál ba Restus mortais Preladu nain 4 iha Tasi-Tolu Dili.
“Ha’u kontente loos partisipa serimónia importante ida ne’e ne’ebé lori fila-fali restu mortais Bispu nain-3 mai Rai Timor-Leste, Amu Bispu nain 3 ne’e marka istória iha Timor, liu-liu Dom Jaime Garcia Goulart, Dom José Joaquim Ribeiro no Monseñor Martinho da Costa Lopes ne’ebé fó kontribuisaun ba luta libertasaun nasionál. Nune’e mós ho Bispu Dom Ricardo, ita fó onra ba sira-nia restu mortais tanba sira-nia kontribuisaun ba nasaun,” Prezidente Partidu PLP, Taur Matan Ruak hateten.
Nia hatutan katak Monseñor Martinho durante funu iha Timor-Leste iha ligasaun di’ak ho Komandante Em Xefe ne’ebé agora Primeiru Ministru Kay Rala Xanana Gusmão. Kontribuisaun ne’e makas tebes ba nasaun, liu-liu iha divulgasaun informasaun kona-ba akontesimentu sira iha Timor-Leste.
“Tan ne’e maka sira hasai nia husi Timor ba hasoru momentu difisil iha Portugal to’o mate. Entaun Timor-oan hotu ita agradese ba nia kontribuisaun iha ita-nia rai. Tanba ne’e ba Timor-oan hotu, ita agradese ba Monseñór Martinho nia kontribuisaun ba nasaun Timor-Leste,” nia konklui.
Jornalista : Moises Guterres
Editora : Gracia Soares
