Lafaek News—Negosiante kiik Clara José Sarmento ho lian klo’at hateten husu elite polítikus sira atu hapara ona polítika obskurantizmu (kari rai-rahun) hodi uza povu kiik hanesan instrument atinje sira (lider) nia objetividade privada.
“Nai ulun sira promete falsu iha tempu kampaña, hetan tiha fiar husi povu ba kaer ukun haluhan povu ki’ik, tanba Timor-Leste ukun a’an tian rua nulu resin ona povu barak sei moris iha kondisaun mukit nia laran,” lian kroat husi negosiante Clara José Saramento, ba lafaek news iha Kristu-Rei, foin lalais ne’e.
Clara José Saramento idade 45, orijen husi munisípiu Ainaro postu administrativu Maubisse, loron-loron halo atividade negósiu iha sidade Dili area Kristu-Rei, fa’an sigaru, pulsa ho be’e aqua hetan osan hodi sustenta nesesidade uma laran no mos selu oan sira nia eskola.
“Ha’u hanesan Inan–aman la bo’ok an oinsá oan sira nia futuru oin, tanba ha’u iha oan nain sanulu(10), maibé nain tolu (3) fila ba kadunan santo hela nain 7 ,maibé nain hitu (7) ne’ebé sei moris nain rua (2) mak remata ona eskola iha ensino sekundáriu no nain 5 da–daun sei eskola iha Ensino sekundariu Paulo Sesto“. Nia konta.
Clara haktuir, nuudar povu kiik labele depende ba governu, tenki esforsu hodi buka osan rasik, maske moris ho negósiu ki’ik, maibé natoon ona atu nune’e bele responde oan sira nia eskola, moris iha sidade difisil atu hetan osan, hakarak lakohi tenki buka osan liuhusi negósiu ki’ik ne’ebé iha atu nune’e bele hakma’an familia uma laran no oan sira nia eskola.
“Maske sasán ne’ebé ha’u fan ho folin ki’ik, maibé agradese ita bele hetan hodi tulun ita nia han hemu, tanba buat hotu iha sidade lao ho osan, sé osan la iha ita atu halo saida loos no sé loos mak atu fó mai ita hodi sosa hahan ba han no haree oan sira nia eskola, tanba ha’u nia kaben mós la iha servisu hodi hetan osan atu haree ba oan sira nia eskola nomós han hemu uma laran nian, tan ne’e hanesan inan tenki esforsu hodi buka tun sa’e hetan netin osan balu, maske loron ida ha’u fan sorti di’ak hetan $10 dolar, sé sorti la di’ak hetan deit $5, maibé agradese bele hetan hodi responde ba buat hotu ne’ebé ita presiza”. Nia hakotu.
Nia dehan, realidade povu nia moris iha Timor Leste, barak sei halerik, roda ekonomia la la’o, povu kiik moris iha situasaun terus no susar, tanba ukun nain sira hanoin de’it ba sira nia an hodi haluha povu iha kraik moris terus, husu governu foun tenke tau matan ba povu iha areas remotas, halo dezenvolvimentu ne’ebé diak hodi lori rendimentu ba povu kiik sira iha baze.
Estajiadu: Rozantinho Almor da Costa
Editor : Agapito de Deus
