Lafaek News—Primeiru Ministru oitavu governu, Taur Matan Ruak, afirma molok termina nia mandatu hanesan xefe governu la halo buat boot ruma, maske kiik maibé kontribui on aba dezenvolvimentu Timor Leste.
Primeiru Ministru Taur Matan Ruak hato’o asuntu ne’e ba jornalista sira hafoin remata enkontru semanal ho Prezidente Repúblika José Ramos-Horta iha Palasiu Prezidensiál Bairu-Pite kuarta ne’e hodi diskuti planeamentu halo lansamentu Aeroportu Internasionál Nicolão Lobato, insialmente iha 18-19 hafoin Governu da-ualu ne’e remata, no mós sei iha enkontru Konsellu Ministru iha loron 7 fulan Juñu hafoin oitavu Governu remata mandatu.
“Ha’u bele hatete ha’u termina ha’u nia mandatu, hanesan mós sira ne’ebé uluk assume hanesan Prezidente Repúblika, Jenerál, Komandante Guerilla ne’e misaun kompletu, ha’u nia kontribuisaun ki’ik oan, uitoan ha’u termina ha’u nia misaun ho nasaun ida katak, ha’u bele kontribui ba ita nasaun ninia dezenvolvimentu, buat ida ne’ebé ha’u sente realiza ona”, katak Xefe Governu Taur Matan Ruak iha Palásiu prezidensiál Bairu-Pite kuarta (24/05/2023).
Xefe Governu ne’e mós hato’o, parabeniza partidu sira hotu ne’ebé partisipa iha eleisaun no espesiál partidu vensedór CNRT.
“Agradese mós ba sidadaun sira nian partisipasaun, kontribuisaun iha problema kiik oan mas kompara ho eleisaun sira seluk kadaves mais nei-neik ita hadia, mellora ida ne’e kredibeliza foti ita nia prestizu, hanesan país ne’ebé valoriza sistema demokrátiku no direitu”, katak atuál PM Taur.
Jornalista : Rita Moniz
Editór : Agapito de Deus
