Lafaek News—Prezidente Partidu Demokrátiku (PD) Mariano Asanami Sabino deklara, seida’uk iha komentáriu kona-ba atu forma governu da-sia ( IX) ho partidu ne’ebé mak manán iha eleisaun parlamentár tinan 2023 hein tribunál Rekursu anunsia.
Mariano Asanami Sabino deklara asuntu ne’e hafoin ho ekipa kongratula Xefe Estadu José Ramos-Horta lori kargu hanesan xefe Estadu kompleta tinan ida, iha Palásiu Prezidensiál Bairu-Pite kinta ( 25/05/2023).
“Ha’u hanoin ita hotu sei hein hela rezultadu husi CNE nian, kontajen sei la’o hela, hein tempu atu Tribunál Rekursu sei anunsia ne’ebé ita hotu tenke hein prosesu ne’e, buat hotu ne’e la’o tuir legalidade, prosesu gradualmente ne’e ita tenke respeitu prosesu hotu-hotu ne’ebé sei finál iha Tribunál Rekursu”, dehan Prezidente Partidu Demokrátiku (PD), Mariano Asanami Sabino iha Palasiu Prezidensiál Bairu-Pite (25/05/2023).
Prezidente PD ne’e hateten, PD seidauk ko’alia kona-ba forma governu , tanba hein hela rezultadu buat hotu-hotu loos ona, definidu ona foin book an ko’alia ba malu.
Parte PD ne’e mós sujere, forma governu da-sia tenke iha méritu, méritu ne’e la sukat de’it husi universidade ka mestradu ka doutoramentu, maibé méritu iha kapasidade, nia iha koñesimentu klean ne’ebé sempre aposta ba estadu ida ne’ebé bele lori estadu ne’e la’o ba oin.
“Presija ema matenek, no polítika atu lori rai ne’e ba oin matenek no vontade, vontade tenke maka’as, komitmentu tanba ita tinan 24 ona, iha prosesu libertasaun povu nia laran ne’ebé ita tenke hakat ona, kurije saida mak durante la di’ak no falla”, katak atuál Deputadu PD Asanami.
Assanami relata, PD sempre prepara nia kuadru, ninia ema hotu-hotu hatene PD laran ne’e laiha falta ba ida ne’e, setór no asuntu hotu-hotu ne’e PD iha hela, Partidu Demokrátiku mós hato’o parabens ba povu tomak, tanba TL bele tuir eleisaun parlamentár ne’e ho susesu no la’o di’ak.
Iha okaziaun ne’e Prezidente Repúblika José Ramos-Horta mos fó parabens ba partidu PD ninia esforsu, no kontribuisaun liu-liu kampaña ne’ebé fó mensajen pas.
Jornalista : Rita Moniz
Editór : Agapito de Deus
