Lafaek News—Prezidente Partidu Libertasaun Popular (PLP) atuál Primeiru Ministru oitavu governu konstitusional, deklara relasaun ho rezultadu ELPAR 2023, kadeira 8 tuun ba kadeira 4, simu desizaun povu nian ho liman rua tanba la’os hakarak.
“Se ita boot sira lembra, ha’u nia entrevista loron bainhira ha’u ba vota, ha’u nia liafuan mak ne’e simu buat ne’ebé povu fó, no la’ós buat ne’ebé ita hakarak, ita hakarak ne’e buat seluk ida, ha’u bele kadeira 8 mantein ho kadeira 20, mais ne’e lá’os buat ne’ebé povu hakarak entaun ita simu ida ne’ebé sira hakarak”, hateten Prezidente partidu Libertasaun Populár (PLP), Taur Matan Ruak ba jornalista sira hafoin hasoru malu ho Prezidente Repúblika José Ramos-Horta iha Palasiu Prezidensiál Bairu-Pite kuarta ( 24/05/2023).
Atuál Primeiru Ministru Taur ne’e deklara, Agora, naturalmente partidu hotu-hotu ninia mehi oinsá fó kontribuisaun ba dezenvolvimentu nasaun TimorLeste, ajuda kombate kiak.
“Iha boot sira hatene kiak multidemsionál ne’e 40% ka 50% ne’e ita haree setór tolu importante, rendimentu setór ekonómiku, edukasaun, saúde, 47% má-nutrisaun, 36% inseguransa alimentar, 9,6% dezempregu ne’e dezafiu, ita dezafiu sira ne’e iha governasaun ida mak la resolve, tuir tan mai Portugál iha tinan 80 besik 90 nia sei ko’alia kiak, Timor tinan 20 komesa de’it”.
Enkuantu dadus fó sai husi Servisu Tekniku Administrasaun Eleitoral (STAE) resultadu eleisaun parlamentár periódu 2023 ne’e partidu CNRT mak hetan votus 288101, porsentu 41,62 ho kadeira 31, partidu PLP ho votu 40696 porsentu 5,88, ho kadeira 4. no FRETILIN hetan kadeira 19, KHUNTO kadeira 5 no PD kadeira 6, Partidu Verdes Timor la ultrapasa bareira 4%.
Jornalista : Rita Moniz
Editór : Agapito de Deus
