Lafaek News-Labarik feto bonita isin mutin ain a’as ho naran Carmelina Fonseca Madeira durante tinan hitu (7) nia laran, la goza nia direitu hanesan labarik sira seluk ne’ebé moris ho normal.
Carmelina Fonseca Madeira moris iha loron 17 Jullu 2013, iha Hóspital Gleno, Munisípiu Ermera, dadaun ne’e halo tinan hitu ona, maibé ladun goza nia direitu hanesan labarik sira seluk tanba, desde tinan rua hetan moras Defisiénsia pisikologia.
Nune’e Carmelina mós ko’alia la hatene, sentina mós iha fatin de’it, fó hahan mós persiza los inan-aman haree hodi fó haan no hemu, nia sa’e eskada de’it la hatene presiza ema ruma kaer mak foin sa’e.
Carmelina husi aldeia Kukoa, Suku Railaku-Leten, postu Administrativu Railaku, munisípiu Ermera, nu’udar oan da-uluk husi Armindo Madeira de Oliveira no Natalia Fonseca, dadaun ne’e Carmelina iha maun alin nain rua.
Ho kondisaun ida ne’e, halo Carmelina Fonseca, labele halo buat ida iha nia moris tomak hodi goza direitu hanesan nia kolega sira seluk ne’ebé mak kontinua tiha ona ensiku baziku.
Natalia Salsinha Fonseca inan hosi Carmelina haktuir, Carmelina moris iha bainhira nia sei iha kanotak ba koko iha hospital normal to’o partus mós ho kondisaun normal, maibé to’o ona tinan rua kondisaun ida hanesan ne’e lori tristeza bo’ot ba família Carmelina rasik tanba uza sira nia tempu hodi haree de’it ba nia.
“Camelina moris ho kondisaun normal, momentu nia moris ho 4,2 kilograma no nia isin di’ak loos, maibé tinan rua mak ami foin identifika katak nia hanesan ne’e,” Esplika Natalia Salsinha Fonseca ba Lafaek News, Sabádu (04/01) iha aldeia Kukoa, Suku Railako-Leten, Ermera
Nia haktuir, Inan-Aman hatene liu tiha tinan rua liu husi sintomas, nia só basa liman de’it no hamnasa de’it hanesan ema kili no haree buat ne’ebé kor-koor dt mak nia tuir de’it.
Nune’e Camelina mós infrenta moras matan ne’ebé hateke ema la moos, depois de família sira lori ba iha matan-dok sira atu haree kondisaun Carmelina, maibé to’o agora kondisaun seidauk normal nafatin.
Atividade Carmelina toba di’ak no lor-loron toba iha kuartu laran de’it tanba, tun ladi’ak ho kondisaun moras ida ne’e, nia kuandu tanis ne’e husi família hatene ona katak nia hamlaha.
Inan Natalia, hatete Carmelina gosta musika kuandu musika lian, nia gosta no kuandu ema ruma lori bikan la’o kona nia oin ne’e nia mós tuir ona.
Natalia dehan moras ne’ebé nia oan hetan sira lori ona ba iha hospital hodi halo tratamentu no Doutór espesialista husi hóspital Ermera mós haree ona, maibé seidauk lori ba Hospitál Nasionál.
Parte família durante esforsu oin-oin ba iha matandok sira hodi haree Carmelita sira hakarak nia oan primeiru ne’e di’ak hanesan mós labarik sira seluk.
Inan Natalia mós sente triste tanba haree Carmelina nia kolega sira ne’ebé moris hanesan ne’e hotu-hotu agora eskola ona só Carmelina de’it maka seidauk eskola tanba nia moras ho Defisiénsia pisikologia.
“Ami laran moras tebes bainhira haree oan feto boot sai hanesan ne’e. Ha’u hakarak tebes nia di’ak, ami buka meus oinsa ho forma oin-oin, maibé nia nafatin hanesan ne’e,” dehan nia ho mata-wen nakonu
Familia ne’ebé forma uma kain iha 2012 ne’e, la desperadu ka lalakon esperánsa ba grasa ne’ebé Na’i Maromak haraik ba sira no nafatin iha esperánsa bo’ot liu hodi esforsu nia oan sai di’ak hanesan labarik sira seluk.
“Esperánsa ami nian mak, hakarak de’it Carmelina di’ak, tanba nia oan primeiru, ami ba matan-dok sira, maske selu hira mós ami prontu de’it, dehan ida ne’e bele kura ami prontu tanba família hakarak nia di’ak hodi halimar hanesan ho kolega sira no ba eskola,” dehan Natalia
Nune’e Inan Natalia mós husu ba parte Kompetente fó apoiu netik ba Carmelina tanba ho kondisaun fisiku ne’ebé la normal, tanba durante ne’e seidauk hetan ajudu husi parte ruma.
Jornalísta : Floriano Soares
Editór : Manico Ximenes
