Ermera (Lafaek News)-Alin Esternita Exposto tinan ualu (8) hakarak los ba eskola hanesan kolega sira seluk, maibé ho kondisaun difisiénsia ne’ebé lor-loron sempre hakdasak de’it iha uma.
Esternita Exposto Soares ho tinan ualu (8), oan husi Alberto Soares no Olga Exposto ho Maun Alin sanulu resin rua (12) ne’ebé durante Esternina moris mai ho kondisaun difisiénte kedas.
Esternita nia moris ne’e, diferente ho nia maun alin sira nomós kolega sira ne’ebé mak mai halimar ho nia iha uma, maibé Esternita ho idade ualu ne’e, lor-loron sempre hakdasak de’it hodi bele halimar ho kolega sira seluk.
“Ha’u hakarak los eskola hanesan kolega sira seluk ne’ebé mak hatais farda eskola nian lori buku no lapijeira ba eskola, maibé ha’u la’o ladiak, pois bin sira dehan eskola dook tan nomós estrada ladiak entaun susar atu asesu ba eskola,” dehan Difisiénte Esternita ba Lafaek News liu husi dada lia, Kuarta (28/10/2020) iha suku Urahou, Munisípiu Ermera.
Maske, alin Esternita ho kondisaun difisiénte, maibé nia gosta ko’alia no hamnasa de’it, bainhira nia halimar hotu, Esternita nia bin kous nia hodi ba uma laran atu bele fó haris no fó hahan ba Esternita haan.
Difisiénte Esternita labarik ne’ebé bonita no isin di’ak, maibé buat hotu Maromak nia planu ne’ebé haraik hela ba Esternita ho kondisaun difisiénsia ain, maske ho kondisaun difisiénte, maibé lalakon vontade atu halimar ho kolega sira ne’ebé moris normal.
Nune’e, Esternita lor-loron la uza senelus, tanba ho kondisaun difisiénsia ain entaun susar atu sinelus.
Iha fatin hanesan Aman Esternita, atuál Xefe Suku Urahou, Alberto Soares, mós senti triste, tanba oan feto di’ak ida mak moris mai ho kondisaun dfisiénte, hanesan aman ida sente triste tebes, nia hakarak ba eskola duni, maibé nia lao ladi’ak, pois eskola dook no dalan mós a’at los.
Fulan hirak liuba ne’e, halo hela tratamentu iha NGO Becora nian durante tinan ida resin, maibé pandémia Covid-19 tama mai iha Timor-Leste entaun ema haruka lori fila tiha mai Ermera.
Kona-ba subsídiu ba ema ho difisiénsia to’o la hetan buat ida ho razaun katak, Oan Esternita tinan seidauk atu simu, tanba trata dokumentus presiza kartaun eleitóral, entaun labele tanba foin tinan ualu.
Antes ne’e mós Diretór Asosiasaun Difisiente Timor-Leste (ADTL) Cesário Freitas sempre tau ba ema ho difisiénsia, tanba ema difisiénsia barak mak seidauk hetan direitu hodi asesu ba iha setór edukasaun.
ADTL esforsu nafatin oinsa atu promove direitu ema ho difisiénsia iha teritóriu Timor laran tomak, tanba tuir situasaun ne’ebé ita akompaña ema difisiénte barak mak seidauk hetan nia direitu.
“Ezisténsia ADTL atu luta ba promosaun no protesaun ema ho defisiénsia ba setór Edukasaun no seluk-tan,” Diretór ADTL promete
Tuir dadus ne’ebé iha ekipa Asosiasaun Difisiénte Timor-Leste rekolla hamutuk 25.000 mill, mak dadaun ne’e ADTL tau matan hela, ida ne’e mak ami nia preokupasaun, tanba ne’e solusaun ne’ebé ami responde ba sira mak, ami tenke halo advokasia ba Ministéiru Edukasaun Juventude no Desportu atu buka solusaun hamutuk.
Jornalista : Floriano Soares
Editór : Devril Noe Fernandes
