Kovalima-(Lafaek News)—Udan iha loron domingu lorokraik maizumenus tuku 4, hamosu bee sa’e (inundasaun) hodi estraga total uma kain 85 iha Suku Beko, Postu Administrativu Suai, Munisíu Kovalima.
Xefe suku Beko, Arlindo Bernardino Lemos, afirma kauza hosi bee sa’e ne’e tanba bee dalan (Valeta) iha aldeia laran ne’e aat nune’e bainhira udan riba tu’un mai bee labele sulin sai ikus rezulta situasaun hanesan ne’e.
Nia informa, hosi akontesimentu refere rezulta aldeia rua mak sai vítima, aldeia Maukola ho total uma kain 136 maibé uma kain 75 mak sofre ba inundasaun, no aldeia Bibi Atan total uma kain 74 maibé uma kain 10 mak hetan estragus hosi bee sa’e.
“Akontesimentu udan boot, komunidade uma kain hamutuk 85 mak hetan inundasaun, ho akontesimentu refere kuaze estraga total komunidade sira nia sasán,” Xefe suku Beko, Arlindo ba LafaekNews via kontaktu, tersa (08/12).
Autoridade ne’e reforsa via kontaktu, kona-ba uma ladún hetan estragus mezmu bee tama, maibé ekipamentu (perlengkapan) uma kain hanesan dapur nian, meza, kadeira no mós sasán seluk inklui bee matan ne’ebé baibain komunidade konsumu loron-loron.
Salienta nia, maibé hafoin akontesimentu hosi parte governu liuliu Sekretáriu Estadu Protesaun Sívil (SEPS) munisípiu to’o kedas iha fatin hodi rekolla dadus komunidade afetadu.
Dadus neebé SEPS foti seidauk bele ajuda emerjénsia agora, tanba iha armajen munisípiu Kovalima sasán sei menus. Maibé tempu badak sira sei ajuda ho emerjénsia,” nia katak
Alende ne’e iha sorin seluk autoridade lokál mós informa, alende sasán uma laran mak hetan estragus, maibé toos ne’ebé durante iha moris tomak komunidade depende ba hetan estragus hotu tanba bee sa’e.
Ikus antes termina konversa via kontaktu autoridade lokál ne’e husu, atu Ministériu Obras Públika bele hadi’a bee dalan (drainazen/valeta) ne’ebé aat, tanba fatór prinsípal hodi rezulta bee sa’e ne’e tanba problema ne’e mós.
Tuir dadús iha Suku Beko Uma kain hamutuk 1174 no total populasaun 5118, kompostu hosi aldeia 9 mak hanesan Aldeia Haemanu, Holbolu, cudulpho/Beko, Halik, Bibi-atan, Leowalu, Teda, Tobur no aldeia Maukola.
Jornalista: Orlando Magno
Editór : Ezequias Tomás
