Lafaek News—Líder másimu FALINTIL-FDTL Maijór Jenerál Lere Anan Timor, afirma eroi no eroina inklui povu barak sakrifika aan tomak hodi sosa ukun rasik aan ida ne’e, nune’e ba líder jerasaun foun inklui joven sira presiza hanoin didi’ak katak ukun aan ninia folin karun tebes la’ós monu tu’un de’it hosi lalehan no ema tau iha bandeiza laran mak oferese ba ita.
Jenerál Fitun Rua ne’e dehan, líder joven sira presiza hanoin didi’ak katak ukun aan ne’e la fasil, nune’e presiza halo reflesaun hodi nafatin iha espíritu nasionalizmu no patriotizmu ba rai no povu ida ne’e, no mós halo reflesaun hodi hanoin hikas fali eroi no eroina inklui povu ne’ebé forsa Indonézia oho iha loron 7 Dezembru 1975.
“Selebrasaun tinan 45 ba Invazaun Indonézia, halo iha fatin ida ne’e, tanba fatin ne’e istóriku atu reflete fila fali ita nia maluk feto no mane ne’ebé Indonézia oho iha fatin ida ne’e,” dehan Lere foin lalais ne’e iha Ponte Kais-Dili, hafoin kari ai funan ba tasi nu’udar simbolu domin ba povu no martires.
Nia reforsa, momentu selebrasaun ida ne’e, fanu no lori ita hotu hanoin hikas fali, momentu forsa invazór tama ita rain hodi halakon eroi no eroina sira nia vida liuliu povu doben rai ida ne’e nia vida, ne’ebé halo ran fakar sulin hanesan mota tu’un to’o ba tasi.
Ikus nia apela hanesan mós fó hanoin nafatin ba joven sira liuliu líder jerasaun foun sira, labele hanoin ukun aan ne’e hanesan prezente (hadiah) mak nasaun unidas (ONU) tau iha bandeiza laran mak oferese mai.
Tanba ne’e bainhira iha oportunidade kaer ukun tenki ukun ho di’ak, tanba rai ne’e antes hetan ukun aan povu barak mak sakrifika nia aan, hodi ikus determina liuhosi pregu ka votasaun iha 30 Agostu 1999.
“Ha’u apela ba jerasaun foin sa’e no lideransa foin sa’e tenki hanoin nafatin independénsia ne’e nia folin, nasaun ne’e nia folin hanesan bain-bain ita dehan katak harii ho ran no isin, tanba ne’e lulik,” hakotu nia
Jornalista : Felisberto F. da Costa
Editór : Ezequias Tomás