Lafaek News- Udan ne’ebé akontese horisehik lorokraik hodi rezulta mota bo’ot sobu agrikultór nia toos, hatodan liután moris Julmira Ruas Castro, tanba Toos ne’ebé kuaze tinan barak nia depende aan hodi aguenta moris kuaze aat total.
Julmira Ruas Castro, moris nu’udar faluk ho oan na’in 3, mane rua no feto ida, la fasil tanba kuaze nesesidade moris loron-loron ho oan sira obrigadu nia tenki buka rasik.
Atu aguenta moris ho ninia oan sira, nia tenki fila rai halo ba toos hodi nune’e kuda netik ai han ruma, nune’e bele uza ba han i fa’an balun hodi resposta ba nesesidade seluk ne’ebé presiza.
Maibé esperansa hela ba esperansa, tanba natureza resposta liuhosi hatudu ninia forsa ou kbi’it. Natureza hodi forsa tomak mai sobu Toos ne’ebé nia halo durante tinan barak nia laran hodi sustenta moris ho de’it tempu minutu balun nia laran.
Tanba ne’e nia sente, moris la’os sai kaman maibé kontinua todan tan de’it, tanba ho akontesimentu ne’e atu husu tan ba sé, hodi bele ajuda iha situasaun refere.
“Sente triste, tanba ha’u ho oan na’in tolu nia moris loron-loron ho Ida ne’e (halo toos). Maibé Agora mota sobu tiha atu halo oinsá,” Julmira ba LafaekNews foin lalais ne’e iha aldeia Ailok Laran-Hera.
Nia hatutan, agora fatin atu garantia la iha ona, tanba durante ne’e moris nu’udar Toos na’in hodi kompleta oan sira nia moris loron-loron maibé buat sira ne’e lakon hotu hanesan mehi ne’ebé la sai realidade.
“Ha’u nia esforsu ho oan sira nia esforsu, kolen-kolen hodi halo Toos Modo ne’e. Hein atu ku’u ba fa’an maka agora mota mai sobu ona, ida ne’e ha’u sente triste tanba la hetan ona osan. Modo iha ha’u kontenti, maibé agora mota mai halo tetuk tiha, ne’ebé sente hanesan lakon osan barak, tanba ami Moris ho kuda modo,” dehan nia.
Entretantu iha sorin ketak, Cornelio Silva Belo, ne’ebé mós moris hanesan Toos na’in haktuir, akontesimentu ne’e maizumenus iha tuku 18:30 lorokraik, udan bo’ot provoka mota tu’un hodi sobu kantareru 5 hosi agrikultór na’in 5 ninian.
Nune’e nia dehan, antes ne’e husu ona ba governu oinsá lori mákina mai para netraliza tiha mota ne’e, nune’e bainhira udan karik labele haterus fali komunidade sira tanba maioria moris hanesan agrikultór, agora la responde ikus akontese tiha hanesan ne’e.
Jornalista : Aniceto Dias
Editór : Ezequias Tomás
