Lafaek News—Komisaun Anti Korrupsaun (CAC-sigla Portugés), hapara direitamente atividade distribuisaun Cesta bázika iha suku Komoro, postu administrativu Dom Aleixo, munisipiu Dili, tanba konsidera hahán ne’ebé kompañia Dili Mart fahe serve ba fó han animal, no la merese ba populasaun atu konsumu.
Intervensaun imediata hodi prende batar fohuk, koto fohuk no modo dodok ne’ebé hala’o hosi kompañia Dili Mart, liuhosi ekípa Espesialista Anti Korrupsaun (EAK) ne’ebé lidera hosi Komisáriu Adjunto Komisaun Anti Korrupsaun (CAC) ba Asuntu Prevensaun no Sensibilizasaun, Luís de Oliveira Sampaio.
Liuhosi pájina offísial facebook KAK, Komisáriu Adjuntu KAK Luís de Oliveira Sampaio, hatete ekípa Espesialista Anti Korrupsaun (EAK) no KAK la soi atu kompañia Dili Mart kontinua fahe ai han bázika sira tanba hahan fohuk merese fó han Fahi la’ós atu fó ba povu kbi’it la’ek sira.
“Ami ko’alia tiha ona ho manajer kompañia atu hapara distribuisaun ai-han bázika hanesan batar fohuk, koto no modo tahan dodok ba populasaun. Tanba ai han fohuk sira ne’e merese fo han ba animal ka fahi, la’ós fó ba ita ninian povu,” Subliña Komisáriu Adjunto KAK Luís Sampaio
Alende ne’e ekípa EAK mós prende kafé falun balun, tanba la tuir lista grama no folin ne’ebé Ministériu Komérsiu no Indústria determina. Maibé iha terenu Kompañia Dili Mart fahe la tuir ninia kilogarama ne’ebé determinadu.
Adjuntu KAK Luís Sampaio afirma, Sei iha konsekúensia sériu ba irregularidade ida ne’e. Komisaun sei bolu manager kompañia no responsavel ba programa Sesta Bázika nian iha MTKI.
“Batar ne’ebé fohuk ho modo ne’ebé dodok, ami (prende) no sei halo prosesu. Depois ami sei notifika na’in ba Loza (Dili Mart) ne’e ho ninian responsavel sira. Inklui autoridade kompetente (iha MTKI) ne’ebé ohin iha ne’e hela, tanba sira ninia responsabilidade atu halo supervizaun, maibé husik hela de’it maski sira hare hela,” nia argumenta
Ikus Komisáriu Adjuntu Luís Sampaio afirma, komisaun antes ne’e deskobre sirkunstánsia, hanesan iha fatin seluk, Hera, Metinaro no Líkisa maibé kompañia no autoridade kompetente la hadi’a.
“Entaun, ohin ami halo intervensaun hodi hapara distribuisaun sesta bázika ne’e. Ami aviza tiha ona más sira lakohi hadi’a. Entaun ami hapara no lori sasán (fohuk no dodok) ba hodi halo ka loke prosesu investigasaun,” hakotu Komisáriu Adjunto
Jornalista : Ezequias Tomás
Editora : Nelya Barros
