Lafaek News—Diretór Diresaun Nasionál Servisu Água (DNSA), Eduardo Dias Ximenes, afirma nia parte seidauk simu informasaun hosi tékniku sira kona-ba distribuisaun bee moos ba Aldeia 12 outubru, Suku Komoro, Postu Administrativu Dom Aleixo, Munisípiu Dili paradu, nune’e kompromete sei rezolve asuntu refere.
“Ha’u diretór nasionál, írarkia ne’e ha’u iha xefe departamentu no xefe seksaun. Ne’ebé ha’u husu to’ok kolega sira, tanba tanki monta tiha sira la ense ne’e servisu operasionál tanba sá sira la ba ense, falla hosi karreta ka saida-saida ha’u husu lai,” diretór DNSA relata ba LafaekNews foin lalais ne’e iha ninia edifísiu Kaikoli-Dili.
Reforsa nia, hanesan superior sente hakfodak kuandu simu informasaun hanesan ne’e, no durante ne’e hanoin buat hotu la’o ho di’ak.
“Ha’u rasik hanesan jestór, foin mak hosi parte media hato’o. Durante ne’e la hatene informasaun, ha’u hanoin kala la’o hanesan baibain hela (bee moos distribui hela ba aldeia 12 outubru),” nia rekoñese.
Asuntu ne’e diretór DNSA, Eduardo Dias Ximenes, hato’o liga-du distribuisaun bee moos ba komunidade aldeia 12 outubru paradu besik ona semana 3, maski tanki bee moos governu destaka ona iha aldeia refere nune’e bele fasilita komunidade sira uza ba nesesidade loron-loron.
Jornalista : Juvita dos Santos
Editór : Ezequias Tomás
